Þó komi oft góðir gestir í sveitina fer ekki hjá því að sumir séu betri en aðrir.

 Byggræktunargúrúinn hann Jónatan tilheyrir þeim flokki.

 Hann kom til okkar á laugardaginn til að taka út akrana okkar og stútfylla okkur af margvíslegum fróðleik.

 

 Hér er hann við Judithakurinn í Dalsmynni.  Meiriháttar akur en ekki alveg tilbúinn til þreskingar.
(2.5 ha. = 250 kg + á dag.)

Hann var harður á því að ef dagshitinn næði 10 gr. og akrarnir væru ekki fullþroskaðir bættu 1 ha. við sig 100 kg. fræfyllingu á sólarhring fram að þroska. Þessir 80 ha óþresktu akrar á svæðinu væru því að bæta við sig 8 tonnum á góðum degi ef núllin eru í réttum fjölda hjá mér.

 Allflestir akrarnir okkar voru á því stigi svo við skyldum bíða í 7 - 10 daga með þreskingu.



 Þessi Olsokakur í Hrossholti var kominn það langt að rétt væri að taka hann strax.

Þumalputtareglan væri sú að eftir 15 sept. væri þessi dagshiti ekki að nást og hæpið að byggið bætti við sig eftir þann tíma. Ef ekki gerði næturfrost tæki það þó talsverðan tíma að gulna ef það væri illa þroskað.



 Hér er það Lómurinn á Rauðkollstöðum sem fékk góða einkunn hjá sérfræðingnum. Hann fullyrti að þess væru engin dæmi að Lómurinn tjónaðist í veðri en eftir að hafa heyrt um uppskerubrestinn s.l. haust vegna gæsanna tók hann fram að erfitt væri að rækta það út.



 Nú erum við að gjalda þess hversu seint var sáð í vor, og það er ljóst að Erkilyrkið mun ekki ná fullum þroska þetta árið.


 Þar sem við hjá Yrkjum ehf. viljum halda okkur við úrvalsframleiðslu, munum við bíða rólegir framundir miðjan mánuðinn og vonum okkar vegna og búpeningsins, allt frá rollunum á Brjánslæk til kanínanna suður við Garðskagavita að þetta fjúki nú ekki allt útí buskann fyrir þreskingu.



 Nú eru gæsirnar komnar á túnin hjá okkur og farnar að svifa ógnandi yfir ökrunum og mæla út lendingarstaðina.
 Og svona líta Rauðkollstaðir út frá gæsunum séð þegar þær kíkja í smakkprufu hjá
bóndanum þar.

 
 Nú styttist í göngur og réttir en því fylgir alltaf skemmtileg stemming  hjá okkur í sveitinni.


  Það er ekki fyrirhafnalaust og koma fénu á endastöð.

 Svona líta fjallskilin út hjá okkur á Vesturbakkanum. 

     Réttarstjóri í Langholtsréttum er Guðbjartur Gunnarsson, Hjarðarfelli.
   

  Til fyrri Þverárréttar skulu Rauðamelsfjall og Svínafell leituð laugardaginn 19. september. Réttað verður sunnudaginn 20. september kl. 13:00.

     Önnur leit fer fram laugardaginn  3.október og réttað að lokinni leit um kl: 16:00.

Niðurjöfnun dagsverka:                             1. leit    2. leit           leitarstjóri er:  

Rauðamelsfjall       Þverá                           2            1

                            Dalsmynni                   1                         

                            Kolviðarnes                  1           1             Jón Oddsson

                            Haukatunga I                4           4

                            Kolbeinsstaðahreppur    1            2                        

Svínafell               Haukatunga syðri II        6            5             Ásbjörn Pálsson

                            Haukatunga I                1

                            Kolbeinsstaðahreppur     1             2

Hafursfell              Dalsmynni                     5            5           Svanur Guðm.

að Núpá                Söðulsholt                      1           1

                            Rauðkollsstaðir               1           1

Mýrdalsrétt           Haukatunga I                  ½           ½  

Viðgerð á   Þverárrétt   

  Dalsmynni                      1                                                           
  Þverá                             1       

  Haukatunga syðri II         2

     Gæslu lögréttar annast Halla Guðmundsdóttir, Dalsmynni                                    

     Réttarstjóri í Þverárrétt er Halldór Jónsson, Þverá

     Ábúendur jarða skulu smala sín heimalönd og koma óskilafé í tæka tíð til réttar eða í safngirðingar. 

     Því er treyst að landeigendur leysi ofangreind verk vel og samviskusamlega af hendi og stuðli þannig að því að fé komist í hendur réttra eigenda.

                   Fjallskilanefnd 6/9 2009

  Guðbjartur Gunnarsson.
  Svanur Guðmundsson.    
  Halldór Jónsson.
  Sigurbjörn Magnússon.




Já þá er alltaf sól.

 Þó að það sé rigning.