Þetta gjörbreytta tíðarfar er ekki slæmt og nú vonar maður bara að páskahretið verði svona hret sem enginn tekur eftir.

Svoleiðis páskahret koma sem betur fer alltaf öðru hvoru.

 Það var fenginn klaufskurðarstóll að láni og bústofninn klaufsnyrtur með látum einn daginn.

Ekki slæmt að hafa það fyrir aftan sig.

 Planið var að loka á hundatamningar um síðustu helgi en það fór allt í klessu eins og fyrri daginn.

 Og til að bæta um betur endurskoðaði ég nokkurra ára ákvörðun um að hætta öllum leiðbeininganámskeiðum.

  Ég hafði í nokkurn tíma velt því fyrir mér að það væri gaman að prófa að stokka upp námskeiðstilhögunina, fækka þátttakendum og leggja meiri vinnu í hvern hund.

Þegar mér bauðst svo að skella upp tveim dagsnámskeiðum  með þessum hætti stóðst ég ekki freistinguna.

 Mér fannst þetta koma býsna vel út , miklu minna hangs á þátttakendum og þeir hundar sem á annað borð voru tilbúnir í kindavinnuna bættu sig.

 Og eins og alltaf, lærir maður sjálfur hitt og þetta og sumt hefði ég mátt gera öðruvísi við framkvæmdina.

 Þessi tvö fylgdust áhugasöm með því sem var í gangi á vellinum, bæði innflutt og annað þeirra  laust úr einangrun fyrir aðeins örfáum dögum.

 Alltaf skemmtilegt þegar svona kröftugir nemendur mæta og hrista aðeins upp í deginum.

  Aldrei áður hef ég fengið 8 ára hund á námskeið hjá mér.  Það var sérlega gaman að sjá hvernig eigandanum tókst að breyta vinnulaginu á honum þessa dagstund.

 Lítið mál að kenna gömlum hund að sitja  .

Já, það fær mig enginn til að halda því fram að þessi vetur,  sem er sem betur fer á síðustu metrunum hafi verið góður veðursfarslega.

 Ætla samt hvorki að þreyta mig né aðra með nánari lýsingum á því en þrátt fyrir tíðarfarið hefur veturinn liðið hratt hjá undirrituðum enda í nógu að snúast..

  Hundatamningarnar hafa tekið drjúgan tíma í vetur og gæðin hjá nemendunum hafa verið með besta móti sem gerir þetta allt miklu skemmtilegra. Á myndinni hér fyrir ofan sem tekin var í gær er ekki nema einn aðkomu, en það verður bætt úr því í dag og á morgun, enda fullskipað þessar tvær vikur sem eftir eru í tamningum þennan veturinn.

 Skaflahlíðin sem er vestaní Dalsmynnisfellinu ber nafn með rentu eins og hún gerir reyndar oftast og leit svona út í gær en það er nú eiginlega fyrsti almennilegi dagurinn síðan daginn tók að lengja fyrir alvöru.

 Ekki mikill snjór hér í um 140 m. en ágætis snjóbúskapur þegar ofar dregur. Kannski eiga eftir að sjást myndir af því þegar gefur til að snjósleðast pínulítið.

 Og hér sést inn Núpudalinn með fyrrnefnda Skaflahlíð á hægri hönd, Svörtufjöll sem eru reyndar með bjartasta móti og Skyrtunnu fyrir miðri mynd.

 Hér eru svo Svörtufjöllin og Skyrtunnan séð úr austurátt fyrir nokkrum árum, trúlega svipuð snjóalög núna.

  Já, það er ljóst að veturinn rennur út á örskotshraða eins og vanalega þegar þessi tími er kominn.