Þó mér kæmi í hug vísubrotið hér að ofan þegar ég las athugasemdirnar við síðustu blogg þakka ég hlý orð í minn garð og þátttökuna í könnuninni. Ég þakka ekki síður þeim sem létu könnunina eiga sig, því ég lít að sjálfsögðu svo á,  í hógværð minni og lítillæti að þeir hafi einfaldlega verið sammála commentunum. (Velþekkt að menn lesa útúr skoðanakönnunum með ýmsum hætti.) Þó ég muni efalaust halda áfram að setja á skjá það sem mér finnst skemmtilegt og þegar ég nenni því, er ýmsar hugmyndir í farvatninu sem væntanlega koma í ljós ef þær verða inni áður en lýkur.

  Það bætti í snjóinn í nótt og getur ekki vetrarlegra orðið í sveitinni. Hér er þó búið að vera góðviðri í nokkra daga, meira að segja logn sem er alltaf velþegið hér á Nesinu.


   Ef farið er upp á Dalsmynnisfellið sést mjög vel um stóran hluta þess svæðis sem eftirlegukinda er von í kringum Dalsmynni. Þess ber þó að gæta, að þó Zeissinn minn sé góðu sér hann ekki gegnum holt og hæðir.

   Hérna hefur Iðunn zúmmað svo rækilega á Skyrtunnuna að fjórhjólaförin uppi á Dalsmynnisfellinu sjást greinilega í snjónum. Nú er erfitt um fjallaferðir því hvorki er fjórhjóla eða snjósleðafæri. Snjórinn heldur ekki fjórhjólinu og er ekki nægur fyrir sleðann auk þess sem allir lækir eru auðir.

 En þetta stendur allt til bóta. Annaðhvort eykst snjórinn eða fer um helgina. .

 "Þeir eru alltaf með tamdar rollur í þessu"  heyri ég oft útundan mér bæði við fjárhundasýningar og í keppnum, úr hópi áhorfendanna. Og þó það sé nokkuð ljóst að við sýningar á dýrum, hvort sem það eru hestar, hundar, eða kindur verður sýningin ekki góð nema um tamdar skepnur sé að ræða læt ég svona athugasemdir í léttu rúmi liggja. Staðreyndin er hinsvegar sú að það er sjaldgæft að ná þjálum kindum í keppni eða sýningar, þó ég hafi reyndar haft tamdar kindur til sýninga hér heima síðustu tvö árin.

  Þar sem komin er löng hefð á notkun taminna hunda er komið á gott jafnvægi á milli kindanna og hundsins/anna. Hundurinn hefur ekki bein afskifti af fénu nema það standi framaní honum eða ráðist á hann og kindurnar vita það og eru því býsna rólegar þegar verið að vinna að þeim með hundinum, en hlýða honum vel. Þær eru hinsvegar alltaf tilbúnar að stinga af eða vera til leiðinda ef tækifæri gefst.
  Ég legg því dálitla áherslu á að kenna lömbunum strax fyrsta veturinn að hlýða hundinum og það tekur yfirleitt ekki langan tíma.  Síðustu haust er þessari kennslu yfirleitt lokið áður en lömbin koma á hús því breyttar aðstæður valda því að sífellt er verið að nota hundana við allt haustragið svo lömbin eru búin að læra á þá og rekstrarganginn.



  'I blíðunni í gær tókst loks að þurrka ullina á lömbunum  og hér er verið að koma þeim endanlega í hús þetta haustið. Snilld gekk eitthvað rólega að koma þeim af stað svo föðurbróðirinn var sendur henni til fulltyngis.



 Snilld tekur sigti á húsbóndann til að marka stefnuna óvön svona mörgu fyrir framan sig.



  Svona á að gera þetta og Vaskur sem heldur trúlega að hér sé um kennslustund að ræða heldur sér til hlés og lætur frænku litlu um þetta.

  Það er svo gott að vera ekki stór í fjárbúskapnum þegar kemur
að rúningnum. (og tapinu per kind). 

 

  Nú fer að líða á fyrsta ár þessarar heimasíðu en þó markmiðin með henni hafi kannski verið dálítið óljós var þó ákveðið að reyna ætti að halda henni með lífsmarki í a.m.k eitt ár.
  
  Það sem hefur verið erfiðast í þessu úthaldi er netsambandið hér, en þau eru ófá bloggin sem hafa tapast út í tómið hálf eða fullgerð. Óþarft er að taka fram að þetta hafa undantekningarlaust verið langbeztu bloggin.

  Tíminn sem í þetta hefur farið, hefur svo margfaldast vegna þessarra netskilyrða.
Að öðru leyti hef ég haft dálítið gaman af þessu uppátæki og hef trúlega fengið nokkra útrás fyrir ritþörfina en á einu tímabili ævinnar ætlaði ég mér nefnilega að verða rithöfundur.
Ég ákvað í upphafi  að vera ekkert að brýna lesendur síðunnar  á að koma með comment eða skrifa í gestabók einfaldlega vegna þess að ég veð fram og aftur um annarra manna heimasíður án þess að gera vart við mig.

  Það er hinsvegar ekkert launungamál að comment og kvittun í gestabók getur virkað eins og olía á gangverkið og lífgað upp á síðuna.

  Nú sem  sagt fer að koma tími á að ákveða um framhald síðunnar og þessvegna henti ég til gamans  inn skoðanakönnun, ef þið hefðuð einhverja skoðun á því sem sem hér er verið að gera.
 Ef einhverjum finnst vanta spurningu um eh. í könnunina má commenta um það.

  Hér gerði svo loksins alveg meiriháttar veður í dag.




   Manni fannst þó að svona dagur ætti betur heima í áliðnum janúar en í okt.



  Og vinir mínir á austurbakkanum eiga líka falleg fjöll.  Þeir fengu svo líka sinn skerf af þessum fallega degi. 

Ég átti hann nú samt betur skilið en þeir.