Hvað er þetta, sagði mín heittelskaða (og röddin hljómaði eins og hún væri rétt í þessu að uppgötva að ég væri verulega greindarskertur.)
    Þetta er bara ungt fólk með hugsjónir.

  Tilefni þessa var, að ég var eitthvað að velta fyrir mér þeim gríðarlega framboðsáhuga sem allt í einu helltist yfir,  þrátt fyrir að nýbúið væri að stórskerða eftirlaun væntanlegra þingmanna og ráðherra sem höfðu loksins náðst í ásættanlegt lag ( Að mati forvera þeirra .). 

  Já því nú er allt að gerast í pólitíkinni. ( Sem er bara skemmtileg nú um stundir, hvað sem Ransý segir.)
   Ómar Ragnars leiðir Íslandshreyfinguna sína í náðarfaðm Össurar álverssinna, enda öllum ljóst að í kreppunni fækkar þeim verulega, sem vilja vernda fósturjörðina fyrir óþarfa spjöllum.

  Fyrrverandi (skammtíma) formaður frammaranna skaut sig og eiginlega alla hina frammarana í fótinn þegar hann myndaði allt í einu meirihluta með sjálfstæðinu á dögunum. Það vöknuðu trúlega margir upp við vondan draum og uppgötvuðu það, að nú þegar  sjálfstæðismenn eru óðum að ná vopnum sínum á ný, þá gæti endurreistur framsóknarflokkur þýtt akkúrat þessa niðurstöðu. 
 Og stór hluti þeirra sem Sigmundur Davíð ætlar að landa inn í flokkinn fyrir kosningar vill mjög gjarnan gefa íhaldinu frí a.m.k eitt kjörtímabil, helst miklu lengur.

  Svo er Kiddi sleggja mættur til leiks og eykur enn á vandræðin hjá þeim. Ef þeim tekst ekki að verja fyrir honum tvö efstu sætin þá lítur þetta ekki vel út hjá þeim í þessu kjördæmi. Já Kiddi er seigur, hann vippar sér jafn léttilega milli flokka og forfeður hans milli trjánna í den. Ætli hann sé knúinn áfram af hugsjónunum??

  Kratarnir eru svo að keyra allt í klessu. Ingibjörg ákvað að halda áfram svo það virðist orðin stefna hjá þeim að vera með svona forsætisráherraefni með formanninum. Jón Baldvin telur samt rétt að koma inn og klára evrópumálin. Hann ætlar væntanlega að ná hreinum meirihluta á þingi svo það gangi.

  Og  fölgrænir klikka ekki. Ögmundur tók sér nokkurra mán. frí frá kjarabaráttunni í BSRB til að berja á opinberum starfsmönnum. Hann tekur hverja sparnaðartillögu forvera síns til baka á fætur annarri og bendir ekki á neinn sparnað á móti. Byrjaði að sjálfsögðu á því, að ákveða að reka áfram 5 fullmannaðar skurðstofur á suðvesturhorninu þó tvær  dygðu, enda mikið af vellaunuðum störfum í húfi og margir ósáttir kjósendur.

  Ég er alveg sammála þessu. Bara setja meiri pening í þetta og vandamálið er leyst. Góður hann Ögmundur. Bara að hlusta á fólkið, þá fer allt vel.
  
  Í öllum þessum hræringum hafa meira að segja 3 spurt mig hvort ég væri ekki að fara í framboð.
Einn þeirra var pottþétt að grínast. Ég er ekki viss um einn og sá þriðji hann meinti þetta.  

 Að vandlega íhuguðu máli og þrátt fyrir fjölda áskorana ætla ég samt ekki að gefa kost á mér til alþingis.  

 A.m.k ekki í þetta sinn. 

  



   

 Það er ekki alltaf vont veður í sveitinni.



  Og hvað heitir þetta fjallabýli hér fyrir neðan?  Sá sem veit það, veit kannski líka hvað  hóllinn vinstra megin við bæinn heitir.

Hér fyrir neðan hafa hraun úr sitt  hvorri eldstöðinni búið til árfarveg. Það er vísu dálítið síðan.


 Vestur og austurbakkinn.  Ekki að spyrja að því hvoru megin hraunið er myndarlegra. Kannski tek ég svo mynd í sumar til að sýna hvoru megin grasið er grænna. 

  Þetta svæði sem ég er  staddur á með myndavélina er kallað Gjáin.
 Þegar ég fór hér fyrst um ríðandi fyrir alveg óralöngu fannst mér þetta alveg yfirþyrmandi flottur staður. Það sem sló mig mest sést reyndar alls ekki á þessum myndum.



  Það voru 4 álftir í ósnum og aðeins norðar voru fleiri tugir af öndum. Þær voru varar um sig og leyfðu engar myndatökur á fornaldarmyndavél eins og ég var með.



  Ég komst í svo gott skap við að setja þessar myndir inn, að ég hætti við að blogga um pólitíkina eins og ég ætlaði mér.

  Þið eruð því heppin í dag.

 

    Eftir að hafa nuddað stýrurnar er byrjað á að hleypa hundunum út. Þar fá þeir 10 -15 mín. áður en tveir þeirra koma aftur inn en hinir 3 fylgja með út í gegningarna. Það eru 5 hundar á bænum eins og er, en verða 4 fljótlega. Reyndar hefur ekki verið ákveðið hvort stefnt verði að goti á árinu.

  Mjaltirnar hefjast svo rétt fyrir kl.7.

 Eldri bóndinn byrjar mjaltirnar í gryfjunni en sá yngri smalar kúnum í biðplássið, snurfusar básana,sáldrar  í þá spæni og mætir síðan í mjaltabásinn. 


  Það eru oftast mikil rólegheit í gangi í mjaltabásnum, bæði á bændum og kúm.
Akkúrat núna er engin lyfjameðhöndlun í gangi sem er alltof sjaldgæft og engin nýborin til að mjólka sér.
 Og þar sem mjöltunarhæfileikar okkar ástkæra landnámsstofns er algjörlega laus við alla samræmingu njótum við bændurnir þess, að í hverju holli eru oftast kýr sem eru fastmjólka, mismjólkast eða eitthvað þessháttar.Nokkur hluti kúnna er semsagt eins og alvörukýr eiga að vera og mjólkast  á nokkrum mínútum, meðan hinar þurfa allt uppí korter til að koma frá sér nytinni.



  Þetta er náttúrulega í fínu lagi, því við hér á skerinu vitum að svona á þetta að vera og tíminn er afstæður.
 Yngri bóndinn stingur síðan af  þegar fer að líða á mjaltirnar til að gefa kálfum, tékka af kjarnfóðrið o.sv.frv.

  Það fer síðan hlutfallslega mikill tími í að ganga frá og þrífa  sem segir okkur að búið þurfi að vera talsvert stærra ef gæta á að hagkvæmninni.
 Þó reynt sé að jafna framleiðslunni nokkuð á árið er framleiðslutoppurinn á þessum árstíma og dagsframleiðslan er að slá vel yfir 800 lítrana.

  Mjöltunum er yfirleitt lokið uppúr hálfníu og þar með morgunverkum í fjósi ef eitthvað sérstakt er ekki í gangi.
 Heyið er gefið í heilum rúllum, fjórum í senn. Sú gjöf er að duga í um 3 daga og er reynt að stilla heygjöfina á fyrripart dags. Það tekst ekki nærri alltaf.

  Að loknum fjósverkum er gefið í gamla fjósið. Þar eru kvígur í uppeldi og lömb og veturgamlar ær í fyrrverandi fjóshlöðu.
 Í flatgryfju eru síðan fullorðnu ærnar að fá rúllu tvisvar til þrisvar í viku. Traktor er notaður til að koma henni í gjafagrind og skera hana þar.



   Maður er því kominn í morgunkaffið og fréttirnar í tölvunni uppúr níu. Hinn endinn á deginum byrjar síðan í öfugri röð u.þ.b 15 mín. yfir kl 5. Gjafir í gamla fjósinu og síðan fjósverk sem oftast er lokið uppúr kl. 7.  Burður, veikindi á kúm og ótalmargt uppáfallandi breytir þó þessum tímasetningum oft.  Tíminn á milli mála er svo skipulagður með ýmsum hætti. Hann er þó opnastur fyrir ýmsum möguleikum yfir miðjan veturinn  en vor, sumar og haust, er þessi tími sjaldnast nógu langur fyrir tilfallandi verkefni.

  Þrátt fyrir að hér séu tvær fjölskyldur með reksturinn hefur ekki verið komið á ákveðnum skiptum á fríhelgum og frídögum. Þau mál eru leyst jafnóðum eftir þörfum og lítið spáð í hvort á einhvern hallar í þeim málaflokk.

  Og Íslendingar og Norsarar eru svo farnir að skiptast á seðlabankastjórum af miklum móð.

 Nú er það spurning um viðskiptajöfnuðinn.