Nú er sauðburðurinn hafinn og fer rólega af stað sem betur fer.

 Það eru sæðisærnar og gemlingarnir sem byrja ballið en í beinu framhaldi af sæðingum fengu hrússarnir svo að leika lausum hala í hjörðinni sér til mikillar ánægju.

 Frjósemin í startinu er fullmikil fyrir smekk bændanna, því draumurinn er nú sá að fá tvö lömb úr hverri  fullorðinni ær og eitt úr gemlingi.

 Það væri samt trúlega leiðigjarnt til lengdar ef allir draumar rættust.

 Af  fyrstu 8 ánum eru 4 tvílemdar. Hinar fjórar eru hinsvegar þrílemdar og ljóst að þetta boðar mikla frjósemi þetta vorið. Og ekkert fengieldi frekar en undanfarin ár.


Það er ljóst að þó nokkra ær fá að ganga með 3 lömbum í sumar sem er vont mál þó sumar þeirra fari nokkuð létt með það..

 Sem betur fer var sú níunda með einu lambi og var skellt undir hana tvílembingi undan gemlingi.



 Einu sinni var talað um að fæddist mislitt lamb í Dalsmynni á þriggja ára fresti, spurning hvort nú séu þrjú ár í það næsta.

Golsótt er held ég ljótasti sauðfjárliturinn. Hann er hinsvegar í miklu uppáhaldi hjá minni heittelskuðu svo nú er bara að krossleggja fingurna og vona að Golsi stigist illa í haust.

 Og hér eru gemlingarnir komnir á viðverustað sinn næstu dagana en þeir gætu svo endað úti fljótlega þegar fer að þrengjast í húsunum.
 

 Já nú fer erfiður en skemmtilegur tími í hönd í sveitinni.

Og það vorar með miklum látum.

 Þetta eru ekki tíðindalausir dagar sem nú þjóta hjá á ógnarhraða.

 Mykjunni er ekið á tún og flög með miklum tilþrifum og þar sem gamli 5 tonna dreifarinn er ekki inni í dag eru leituð uppi leigutæki til að redda málunum.



 Þessi tækni hér að geta tengt sogstútinn án þess að fara úr dráttarvélinn er mikil bylting, sérstaklega á þeim býlum þar sem var alvöru húsbóndi og frúin sá um að tengja haugsuguna svo bóndinn þyrfti ekki að yfirgefa dráttarvélina.

 Þegar bilaði lega í dælunni í fyrradag fór allt skipulag vorverkanna úr skorðum og sér ekki fyrir endann á þeim skelfingum.

 Þrátt fyrir mildan vetur gerði frostakafla á auða jörð og frost í jörð hefur tafið sáningu þar til nú.

 En nú eru tækin farin að snúast og aldrei þessu vant er það ekki bleytan í ökrunum sem hrjáir okkur heldur mega þeir ekki þurrari vera.
 Það verður að gæta þess að láta ekki of langan tíma (helst engan) líða milli tætingu og sáningar ef ekki á allt að ofþorna.

 Áburðurinn er kominn í sveitina en nú var skipt um áburðasala í Dalsmynni.



 Það var óvenjulega erfið samningalota núna, því ég var ákveðinn í að pína áburðarsalann til hins ýtrasta. (Sem er ekki mikið).

 Sá vænlegasti var síðan píndur aukalega áður en málinu var lokað en við vorum nokkrir saman í pakka með um 70 tonn.

 Þriggja ára olíusamningur fyrir sama hóp er svo trúlega laus á næsta ári og þá er röðin komin að Einari að pína viðsemjendur okkar.
 Fræsalinn okkar hann Elías í Líflandi er þó löngu kominn út úr öllum píningum, því við fáum bestu verðin hjá honum án þess að nefna það. Þó þau séu nú að vísu ekkert góð lengur.

 Og þegar ég þurfti að bæta smávegis fræi  við eftir hádegi í dag var ekki nóg með að það væri til, heldur var það komið á hlaðið hjá mér eftir nokkra klukkutíma.

 Þetta er samt allt annað líf að eiga við vorverkin núna en í fyrra þegar allt var forblautt og klaki framí í mai. .

Stressið er samt ekkert minna.