Allt frá því að norskir skattsvikarar tóku saman föggur sínar og fluttu til Íslands í upphafi, hafa staðið yfir ýfingar við frumbyggjana, rebbana.

 Þau samskipti hafa svo þróast með margvíslegum hætti gegnum aldirnar og harðnað eftir því  sem samkeppnin jókst um lífsbjörgina.
 Nú eru að verða vatnaskil í þessu stríði því rebbinn sem átt hefur formælendur fáa í gegnum aldirnar á nú orðið vini á ýmsum stöðum og allt upp í æðstu embættismenn þjóðarinnar.

 Sumir eru sannir vinir vegna einhverrar dularfullrar hugmyndafræði um náttúruvernd, en aðrir eru ósviknir afkomendur þeirra sem nefndir voru í upphafi.Þeim  finnst fjármunum illa varið sem settir eru í að halda stofninum í jafnvægi við þann veruleika sem við búum við eftir að hafa þraukað á skerinu í þessi 1200 ár.


 Skiptir það okkur nokkru máli hvor ósnortnar flóavíðátturnar í suðurhluta Miklaholtshreppsins séu iðandi af fuglalífi með rjúpnahreiður á hverju holti eða nánast líflausar með um km. milli refagrenja??

 Nú er staðan sú að sífellt fleiri sveitarfélög kippa að sér hendinni við grenjavinnsluna sem þýðir aukinn kostnað þeirra sem telja rétt að hafa þessi hluti í lagi.
 Þar sem skipulegri refaveiði er hætt eða stórminnkuð er hinsvegar óljóst hvað muni gerast.
Það er þó ljóst að víða verða það afkomumöguleikar refsins sem ákvarða stofnstærðina á þessum svæðum .
 Þetta þýðir verulega fjölgun fyrst í stað og síðan verða það harðskeyttustu dýrin sem verða ríkjandi og munu þá taka það sem þau ráða við, til að lifa af.


                                                                                                      Mynd. Keran Stueland.

 Þetta mun verða mun  algengari sjón en áður og jafnframt mun það fuglalíf sem sumum  þykir mikils virði að hafa í kringum okkur láta  verulega á sjá.

                                                                                                   Mynd. Keran Stueland.
 Hér í Eyja og Miklaholtshreppnum hafa verð unnin um 40 til 50 dýr á ári og þó mér detti ekki í hug að halda því fram að það muni verða árleg fjölgun í það óendanlega, held ég að það sé nokkuð ljóst hvað tæki við.
 Það er með ólíkindum að upplifa hvernig ríkisvaldið veltir málinu alfarið yfir á sveitarfélögin eins og því komi ekkert við það umhverfisvandamál sem verður til, ef refaveiðum yrði hætt í landinu.

Það er ekki einkamál sauðfjárbænda eða missterkra sveitarfélaga hvort refafjöldinn á Íslandi er nokkur þúsund eða tugir þúsunda.

Sjá eldra blogg.  Ósnortið votlendi og fuglaflóran.

 Ég fer ekki oft inná heimasíðuna hjá þér sagði vinur minn úr Húnaþingi.

Hvers vegna, spurði ég hneykslaður yfir þessu tómlæti gagnvart svona frábærri síðu?

 Það gengur allt svo vel hjá þér, engin vandamál svo manni fer að líða illa með sjálfan sig, svaraði vinur minn glottandi.

 Ég játti því að ef hann gæti ekki lesið milli línanna á blogginu hjá mér og dregið hæfilega frá því sem þar komi fram, væri trúlega best fyrir hann að lágmarka heimsókirnar.

 Nú er búið að ganga á ýmsu í búskapnum síðustu vikurnar.

Um jólin fór vökvarör í flórsköfukerfinu  sem hefur nú reyndar aldrei virkað fullkomlega síðan það var sett upp  2004.
 Býsna langt síðan maður hefur komist í að moka flór og trúlega í fyrsta sinn á ævinni sem yngri bóndinn kynnist þessu þroskandi starfi.

  Í kuldahvellinum í síðustu viku fraus svo allt sem frosið gat í gamla fjósinu þar sem kvíguuppeldið er til húsa:  Það hefur ekki gerst svona verklega síðan kýrnar fluttu út.
 Það slapp nú samt allt til án þess að rörin tjónuðust.

 Snigillinn úr fóðursílóinu sveik okkur svo á dögunum og mun fyrst komast í lag í dag.
Það er að vísu ágætt að fá svona líkamsræktandi bilanir samhliða og uppúr  jóladekrinu.

 Og nú er norðanbelgingurinn að byrja að taka á taugarnar en ég þoli hann nú ekki með góðu móti nema svona í rúma viku.
 Ég hefði svo gjarnan viljað hafa eitthvað af snjónum sem norðlendingum er boðið uppá þessa dagana því þessi frostakafli á auða jörð gæti sett strik í reikninginn við akuryrkjuna í vor.



 Ég og mín heittelskaða brugðum okkur svo í borg óttans á föstudaginn. Viðvaranir útvarpsins um
 " ekkert "  ferðaveður höfðu mjög góð áhrif á umferðarþungann til og frá höfuðstaðnum og hafa væntanlega sett mark sitt á útsölurnar , en á röltinu gegnum Kringluna fannst mér traffíkin vera minni en á venjulegum  degi.

En nú lengir daginn hratt og allt að komast á fullt hjá mér í ýmsum málaflokkum.