20.10.2011 22:30

Að blogga um eitthvað skemmtilegt.

Stundum þegar ég sest niður til að koma á skjáinn einhverri frábærri blogghugdettu lendi ég á allskonar glapstigum.

Kannski þarf ég að finna mynd til að setja með blogginu og þar sem myndasafnið er orðið ansi mikið að vöxtum og illa skipulagt, gleymi ég mér oft við að rifja upp eitthvað tengt myndum sem ég rekst á og kemst ekki lengra það kvöldið.

Ekki gengur betur ef ég ætla að leita uppi eitthvað gamalt blogg til upprifjunar, þá verður ekkert bloggað það kvöldið.

Þessi mynd minnti mig á nístingskalda grenjalegunótt í norðanroki með hitastig um frostmark í liðnum júnímán. Það var hlaðið upp smáskjól fyrir versta rokinu. Þarna var legið frá kl.21 til 5 að morgni.

Þessi mynd er mun hlýlegri af honum Flugarri mínum Flákasyni. Móðirin er Fjóla frá Árbæ sem ég á þriðjungshlut í. Allir hrossaræktendur þekkja bjartsýnistilfinninguna sem grípur eigandann þegar fæðist folald.
.

Hér er aðal kornræktargúrú Íslands að skoða þann akur hjá mér sem reyndist verða sá uppskeruminnsti um það er lauk, með miklu af geldfræi og hliðarsprotum.

Seinni leitin á Rauðamelsfjallinu var erfið og köld. Hér erum við staddir við Ármótin þar sem Flatnáin og Sátudalsáin( t.h. )koma saman. Sátudalurinn er næsti dalur vestan við Heydalinn með samnefndum vegi. Þarna eru fallegar fossaraðir á báða bóga, sérstaklega uppmeð Flatnánni.

Og eins og þið eruð eflaust farin að átta ykkur á, verður ekkert úr alvörubloggi þetta kvöldið.

Tengill á færslu

Bæta við áliti

Sýna álit

15.10.2011 20:56

Stóri hrútadagurinn á Snæfellsnesi.

Já, lamhrútasýningin á Snæfellsnesi fór fram í snæfellskri blíðu eins og hún gerist hvössust og úrkomumest.

Þar sem varnarlína skiptir svæðinu var sýningin austan girðingar haldin í Haukatungu á föstudagskvöldi og aðalsýningin síðan í Bjarnarhöfn í dag. (Laugardag.)

Alls voru sýndir yfir 70 lambhrútar og var stærsti hópurinn hvítir hyrndir eða 45 talsins.

Frá sýningunni í Haukatungu.

Næst stærsti hópurnn voru mislitu hrútarnir og síðan þeir kollóttu.

Þarna voru upp til hópa frábærir hrútar og sérstaklega er gaman að sjá hvað það eru öflugir einstaklingar í mislita hópnum.

Hér eru 5 efstu vestan girðingar. T.v. er Hriflonssonur frá Gaul sem lenti í öðru sæti og næst honum hrútur frá Hjarðarfelli sem varð þriðji. Allir algjört metfé.

Dómararnir þeir Jón Viðar og Lárus Birgisson voru ekki öfundsverðir að gera upp á milli hrútanna þegar kom að endanlegri röðun.

Sá efsti í þessum flokki og jafnframt sá sem dæmdist besti hrútur sýningarinnar var undan Gosa frá Ytri Skógum í eigu Ásbjarnar Pálssonar í S. Haukatungu.

Og ég er ekki frá því að félagi Ásbjörn hafi bara verið nokkuð sáttur við daginn.

Hér eru verðlaunahafar í hvítum hyrndum.

T. v. Heiða á Gaul sem átti efsta hrútinn í fyrra en þann í öðru sætinu þetta árið. Ásbjörn og síðan Gunnar á Hjarðarfelli með þriðja sæti.

Eigendur mislitu hrútanna . frá v. Arnar Ásbjörnsson Haukatungu, Lauga Hraunhálsi og Eggert á Hofstöðum.

Verðlaunahafar í kollótta flokknum. Harpa og Guðbjartur Hjarðarfelli, annað og fyrsta sæti og Herborg Sigríður í Bjarnarhöfn með þriðja sæti.

Þessi stóð efstur af þeim kollóttu.

Ég held að þau Heiða og Júlli á Gaul hafi átt hrút eða hrúta í lokauppröðun í öllum flokkum. Hér bíða þau hin rólegustu eftir niðurstöðu um toppsætin í hvítum hyrndum, þar sem þau náðu öðru sætinu og áttu síðan annan hrút í 5 hrúta röðun.

Hér er Jón Viðar að messa yfir söfnuðinum. Nú voru í fyrsta sinn veittar viðukenningar fyrir skýrslufærðar ær sem stóðu efstar á svæðinu fyrir kynbótamat tiltekið árabil. Þar stóð efst einhver eðalær í Mýrdal sem ég kann ekki að nefna.

Það var Sauðfjárræktarfélag Helgafellssveitar og nágrennis sem sá um sýninguna og veisluna sem beið okkar þarna að loknum dómum. Algjörlega meiriháttar hjá þeim.

Já, maður þarf greinilega að fara að taka á því, í ræktunarmálunum.

Skrifað af svanur

Tengill á færslu

Bæta við áliti

Sýna álit

13.10.2011 22:05

Árhringur sauðkindarinnar á síðustu metrunum.

Nú fer að sjást fyrir endann á rolluárinu og styttist ótrúlega í að kindur verði teknar á hús og rútínan hefjist á nýjan leik.

Réttarhöldum og leitum lokið, þó enn eigi eftir að fara á fjöll og ná kindum sem slæðast hér inná vesturhluta Eyjarhreppsins gamla.

Það er ekki svo langt síðan að hér í sveitarfélaginu (Eyjarhr.) voru nokkur þús. fjár á fóðrum en nú eru vetrarfóðraðar kindur vel innan við 400 samtals, á 3 bæjum..

Ágangurinn inn á svæðið er mikill og héðan frá Dalsmynni var flutt um 500 fjár misjafnlega langt að komið.

Héðan var svo sent " allt " sláturfé rúmlega 200 st.á þriðjudaginn, en það endar í Hvíta Húsinu á Hvammstanga.

Meðalvigtin kom mér skemmtilega á óvart en hún var rúmu kg. hærri en í fyrra . Gerðin lækkaði hinsvegar aðeins og fitan hækkaði um heilt stig. Fylgdi sem sagt böggull skammrifi. 19,27 kg. - gerð 9.84. - fita 8.05. Þetta er eins og gerist löngum í ræktuninni, alltaf eitthvað eftir til að stefna að.

Nú er hrútasýningin framundan um helgina, bólusetning líflamba fljótlega í næstu viku o.sv.frv.

Og ekki dugar að loka svona rolluspjalli nema láta þess getið að heimtur eru með skásta móti, nánast kollheimtur á fullorðnu og örfá lömb sem vantar.

Og það rignir og rignir sem aldrei fyrr.

Skrifað af svanur

20.10.2011 22:30

Að blogga um eitthvað skemmtilegt.

15.10.2011 20:56

Stóri hrútadagurinn á Snæfellsnesi.

13.10.2011 22:05

Árhringur sauðkindarinnar á síðustu metrunum.

Vafraðu um

Tenglar