Fjárhundakeppnirnar eru nokkurskonar próf hjá hundunum sem eru að lenda í allskonar uppákomum í brautinni. Taminn góður hundur á samt að geta lokið rennslinu með 60 stig plús, sama í hverju hann lendir.


  Hér erum við Vaskur búnir að skipta hópnum og eigum eftir að koma honum inn í réttina.



  Og hér sjáum við fyrir endann á því.

Við lukum rennslinu með 82 stigum eða 18 refsistigum. Sterkasta hliðin hjá Vask er úthlaupið og að koma með. Þar náði hann 48 stigum af 50 mögulegum.

 Í unghundakeppninni verður hinsvegar reynsluleysið oft til vandræða þó dýrið sé orðið töluvert tamið.  Nú var Snilld að taka þátt í fyrstu keppninni sinni. Henni gekk vel til að byrja með en svo fór stressið með hana, enda áhuginn alveg gríðarlegur.



   Hún náði 58 stigum af 80 mögulegum og eins og hestamennirnir segja stundum , held ég að hún eigi kannski aðeins inni fyrir framtíðina.

  Það eru skiptar skoðanir um það hjá okkur sem erum að temja hundana okkar hversu fljótt á að setja pressu á unghundana með að vinna hægar og gera erfiðari verkefnin. Ég geymi það til vetrarins að gíra Snilld niður og slípa hana til.






 Fyrir þá sem vilja sjá útá hvað þetta gengur, bendi ég á myndaalbúmið með Vask þar sem myndirnar eru textaðar.

 Síðan eru á fjórða hundrað myndir komnar inn á 123.is/smali.

 

 

  Þegar hundafjöldinn fór að fara úr böndunum varð að gera eitthvað í málunum. Eftir að hafa velt fyrir mér hlutunum, skoðaði ég hundahótelið hjá þeim heiðurshjónum á Bergi  tók nokkrar myndir o.sv. frv.

  Síðan var yngri bóndanum boðið í bíltúr með málbandið og þá fóru hjólin að snúast.

 Efnið í grindunum eru  6mm teinar.Í römmunum er 20 mm. prófíll og 20 mm.skúffujárn  sem milliplöturnar eru felldar inní. Allt efnið var tekið svart (ógalvað) og endað á að grunna það og mála.

  Hundarnir eru mjög ánægðir í þessu og ef koma gestir er þrengt að heimahundunum.
Mín heittelskaða var meira að segja nokkuð ánægð með framtaksemina hjá mér í nokkra daga.



  Dáð litla sem bjó fyrstu dagana í stóru flutningsbúri, kunni aldrei við sig þar. Hún var hinsvegar fljót að fíla þetta búr í botn, enda rúmt um hana, en þetta er gotbúrið. Þar sem nú virðast hundaáhugamennirnir vera að kíkja við hjá mér skellti ég inn myndum í albúm..

  Svo eru náttúrulega allir velkomnir á smalahundakeppnina hér á morgun, laugardag kl  1.

Þar verður trúlega fámennt en mjög góðmennt og það gætu vel sést góð tilþrif í brautinni.
 

  

    Sveitarstjórnarmennirnir ala með sér margan drauminn, sérstaklega fyrstu kjörtímabilin meðan þeir eru ferskir og ekki farnir að staðna í málunum.

   Einn draumurinn er að lækka álögurnar á samborgarana, annar að auka þjónustuna svo íbúunum líði sem bezt. Þetta fer reyndar ekki vel saman en draumarnir rætast nú heldur ekki alltaf.
 
Nú standa sveitarstjórnarmennirnir/fólkið frammi fyrir því að þurfa hugsanlega að skerða þjónustuna við borgarana. Sumir komast kannski ekki hjá því að hækka álögurnar líka.
 Óvissan í tekjustofnunum er mismikil eftir samsetningu sveitarfélaganna. Það er reiknað með niðurskurði á ríkisframlagi á jöfnunarsjóð, lækkun á útsvarstekjum, auknum vanskilum o.sv. frv.
 Og eigna/skuldastaða sveitarfélaganna er svo ákaflega misjöfn.

Þetta er verið að glíma við þessa dagana. Fjárhagsáætlun sveitarfélaganna og grunnskólans.

 Eyja- og Miklaholtshreppur er nokkuð brattur, skuldlaus og íbúasamsetningin þannig að kreppan hefur ekki mikil áhrif svona í upphafi. Það verður trúlega niðurskurðurinn á jöfnunarsjóðnum sem mun koma verst við okkur. Samstarfssveitarfélagið um grunnskólann er hinsvegar alvörusveitarfélag, sem mun trúlega finna af  þunga fyrir samdrættinum og snarminnkandi útsvarstekjum og hugsanlega talsverðri aukningu á félagslegu þjónustunni, lóðaskilum o.sv. frv.

  Það er kannski ekkert stórt farið að gerast í uppsögnum og samdrætti en menn eru samt farnir að bretta upp ermarnar og brýna niðurskurðarhnífinn, því það er nokkuð ljóst hvert stefnir.

  Við erum að læra það nokkuð hratt þessa dagana , óbreyttir og sveitarstjórnarmenn og það gengur ekki að líða áfram gegnum lífið og eyða meira (mun meira) en við öflum.

  Það er samt talsvert í  að við sjáum niðurstöðuna á því, hvað þeir félagarnir, Sigurður  Einarsson,  Björgólfur og Jón Ásgeir eru búnir að gera okkur.