Færslur: 2011 Janúar
20.01.2011 09:25
Forréttindi að framleiða matvæli á Íslandi. ( Og auðvitað að neyta þeirra.)
18.01.2011 22:40
Rebbinn.Takmarkaður eða?? Myndir- ALLS EKKI fyrir viðkvæma.
Allt frá því að norskir skattsvikarar tóku saman föggur sínar og fluttu til Íslands í upphafi, hafa staðið yfir ýfingar við frumbyggjana, rebbana.
Þau samskipti hafa svo þróast með margvíslegum hætti gegnum aldirnar og harðnað eftir því sem samkeppnin jókst um lífsbjörgina.
Nú eru að verða vatnaskil í þessu stríði því rebbinn sem átt hefur formælendur fáa í gegnum aldirnar á nú orðið vini á ýmsum stöðum og allt upp í æðstu embættismenn þjóðarinnar.
Sumir eru sannir vinir vegna einhverrar dularfullrar hugmyndafræði um náttúruvernd, en aðrir eru ósviknir afkomendur þeirra sem nefndir voru í upphafi.Þeim finnst fjármunum illa varið sem settir eru í að halda stofninum í jafnvægi við þann veruleika sem við búum við eftir að hafa þraukað á skerinu í þessi 1200 ár.
Skiptir það okkur nokkru máli hvor ósnortnar flóavíðátturnar í suðurhluta Miklaholtshreppsins séu iðandi af fuglalífi með rjúpnahreiður á hverju holti eða nánast líflausar með um km. milli refagrenja??
Nú er staðan sú að sífellt fleiri sveitarfélög kippa að sér hendinni við grenjavinnsluna sem þýðir aukinn kostnað þeirra sem telja rétt að hafa þessi hluti í lagi.
Þar sem skipulegri refaveiði er hætt eða stórminnkuð er hinsvegar óljóst hvað muni gerast.
Það er þó ljóst að víða verða það afkomumöguleikar refsins sem ákvarða stofnstærðina á þessum svæðum .
Þetta þýðir verulega fjölgun fyrst í stað og síðan verða það harðskeyttustu dýrin sem verða ríkjandi og munu þá taka það sem þau ráða við, til að lifa af.
Mynd. Keran Stueland.
Þetta mun verða mun algengari sjón en áður og jafnframt mun það fuglalíf sem sumum þykir mikils virði að hafa í kringum okkur láta verulega á sjá.
Mynd. Keran Stueland.
Hér í Eyja og Miklaholtshreppnum hafa verð unnin um 40 til 50 dýr á ári og þó mér detti ekki í hug að halda því fram að það muni verða árleg fjölgun í það óendanlega, held ég að það sé nokkuð ljóst hvað tæki við.
Það er með ólíkindum að upplifa hvernig ríkisvaldið veltir málinu alfarið yfir á sveitarfélögin eins og því komi ekkert við það umhverfisvandamál sem verður til, ef refaveiðum yrði hætt í landinu.
Það er ekki einkamál sauðfjárbænda eða missterkra sveitarfélaga hvort refafjöldinn á Íslandi er nokkur þúsund eða tugir þúsunda.
Sjá eldra blogg. Ósnortið votlendi og fuglaflóran.
16.01.2011 22:10
Dalamenn á fjárhundanámskeiði.
Nú fer að koma sá tími að tekið verði á því í tamningunum en aðalástæðan var samt sú að Mýrdalsbóndinn var með yfirbókað námskeið í dag. Ég var því ráðinn fyrsti aðstoðarmaður, ásamt því að redda reiðhöll undir námskeiðið.
Það var Félag Sauðfjárbænda í Dölum sem stóð fyrir þessu þarfa framtaki og greinilega talsverður áhugi þar, á því að koma sér upp góðum hundum.
Fyrra hollið mætti um tíuleytið en restin um eittleytið ásamt nokkrum sem rákust þarna inn.
Hér fylgjast þau áhugasöm með djúpthugsuðum kenningum um, hvernig á að byggja upp samskiptin og leiðréttingar í uppeldinu og þjálfuninni.
Aðstaðan í reiðhöllinni er algjörlega frábær til svona byrjendaleiðbeininga en lengra komnu hundarnir þyrftu aðeins meira rými til að njóta sín.
Hér er rolluleiðtogi Dalamanna ásamt Gísla að dáðst að Títu sem er á réttum hraða á beinu
brautinni.
Og Christina og Blesa fylgjast hinar ánægðustu með.
Lubbi á Sauðafelli sýndi ýmsa góða þætti úr Garrýgenunum sem búa í honum. Því miður leyndust nokkur alvöru Garrýgen í pakkanum líka, sem þarf að vinna úr.
Rebekka á Hólum og Lísa frá Valþúfu sýndu báðar góða takta í náminu.
Mér fannst óvanalega hátt hlutfall af þessum 13 hundum sem mættu þarna vera dýr sem ég gæti vel hugsað mér að temja og nota .
Það staðfestir kannski það álit mitt að B C ræktunin sé dálítið á beinu brautinni þessi árin og var kominn tími til.
Myndir frá hestamiðstöðvarnámskeiðum. námskeið 2010/2011
