Ærin hnusaði af lambinu, rak tunguna tvisvar í það og ýtti því svo verklega frá sér með snoppunni.

Hún leit á mig með augnaráði sem mér sýndist þýða, heldurðu að ég sé asni  helvítis fíflið þitt.

 Hún hafði átt eitt lamb nokkrum mínútum áður og ég hafði því umsvifalaust sótt þrílembing sem fyrstur var á biðlistanum, til að að venja undir hana.

  Byrjað á að baða það nýfædda uppúr volgu vatni betrumbættu með legvatnssulli. síðan var þrílembingurinn baðaður  uppúr gúmmelaðinu og þess vandlega gætt að hvergi væri á honum þurr þráður í orðsins fyllstu merkingu.



 Viðbrögðin voru óvenjuleg því oftast taka þær aukalambið umsvifalaust og málið er dautt.

 Nú bætti ekki úr skák að það nýfædda fór að láta í sér heyra, greinilega frekar óhresst yfir meðferðinni. Ærin virtist strax átta sig á því að þarna væri það eðalborna, þó hún sæi það hvergi og fór nú heldur að ókyrrast.
  Þó sá eigi að vægja sem vitið hefur meira lét ég mig ekki í þetta sinn, mjólkaði smávegis yfir lambið úr ánni og yfirgaf síðan vettvanginn smástund.

 Þegar ég kom til baka hafði móðureðlið yfirtekið tortryggnina og verið að kara lambið hátt og lágt.
Nokkrum mínútum seinna fékk hún  sitt eigið lamb til meðhöndlunar en ég hafði mig í langþráða kaffipásu enda klukkan farin að síga í 6 og tekið að styttast í morgunmjaltir.

Sæðingar og samstillingar.

 Gegnum tíðina hefur oft verið reynt að stytta sér leið í kynbótunum með því að samstilla gangmál bestu ánna og sæða þær með úrvalshrútum.

 Þetta hefur gengið upp og ofan, aðallega ofan og var eiginlega búið að gefa þessa aðferð upp á bátinn.
 Bæði var fangprósentan mun minni en með hefðbundnum sæðingum og frjósemin mun slakari.

 Nú var ákveðið að samstilla 25 kinda hóp tveim gangmálum fyrir sæðingu og sjá hvort það breytti einhverju.  



 Valdar voru úrvalsær eftir afurðastigi og gerð lamba. Þær voru svampaðar 12 nóv. og fóðraðar á heyi eingöngu .
 Fyrstu 4 ærnar voru sæddar 13. des.  17 ær þ. 14 des. og hinar 15 og 16 .

Af þessum 25 eru 17 bornar. Tvær einlemdar, tvær þrílemdar og 13 með tveimur.

Ágætlega ásættanleg útkoma nema hrútahlutfallið er alltof hátt. Það er örugglega Lárusi Birgis. að kenna.
Spurning hvernig hægt er að vinna úr því fyrir næsta haust.

 Nú eru aðrar sæðisær allflestar bornar , meiripartur gemlinganna og restin að komast á fulla ferð.

Gróður að verða nothæfur til að taka við lambfénu en veðurfræðingarnir standa sig ekki og sleppa ýmist óþarfa hæðum eða lægðum í einhverja vitleysu.

En hvað sem öllum fræðingum líður er stefnan sett á að setja fyrstu lambærnar út uppúr miðri næstur viku.

Já, er ekki kúrsinn bara áfram og upp hjá öllum, nema náttúrulega LÍÚ sem eru að setja sig á hausinn með auglýsingakostnaði.

 

 Tvisvar til þrisvar í mánuði er farið niður í byggskemmu, valsað, sekkjað og vigtað út 2 - 3 tonn af byggi fyrir búið.


                                                                          Gömul auglýsing úr skólablaðinu Jökli.

Það eru fyrst og fremst kýrnar sem " njóta " þessarar heimaframleiðslu en byggið er notað eins og hægt er, sem kjarnfóður fyrir þær.

Það er hinsvegar þannig samansett að bæta þarf við það steinefnum og þegar kýrnar eru svo komnar í ákveðna nythæð fá þær til viðbótar próteinríkt kjarnfóður.



 Það er stór afkastamikill valsari aftan í dráttarvél sem sér um völsunina en hér er valsað niður í móttökuna og byggið síðan sett aftur uppí síló sem það er svo sekkjað úr.



 Í upphaf byggræktunar var þetta skemmtileg tilbreyting frá hefðbundnum bústörfum, en þegar við vorum á tímabili, farnir að valsa , sekkja og afhenda til sölu nokkur hundruð tonn af byggi, fór af þessu glansinn.  
Nú er þetta með leiðinlegri bústörfum allavega hjá mér.


                                                      Tveggja vikna skammtur eða svo klár í heimkeyrsluna.

 Þessi ræktun er alltaf dálítið mikið lotterí og þegar eru undir 20 - 30 ha. er ekki lengur hægt að tala um þetta sem tómstundargaman.
Ef næst sáðbygg úr heimaræktun og menn geta nýtt búfjáráburðinn í ræktuninni er hægt að minnka tilkostnaðinn talsvert, en þau árin eru samt fleiri sem allt stendur í járnum með afkomuna.


                                                                            Heimabygg spíruprófað.

Þá er bara að gæta þess að vera ekki að skoða tölur með of mikilli smámunarsemi.



 Jarðræktarstörfin eru oftast skemmtileg og fátt gleður augað meira en fallegur velþroskaður akur.
Og ekki skemmir ef uppskeran næst af honum áður en hún fýkur niður.

 En þá eru það gæsir  og gæsaskyttur sem kætast þó skytturnar reyni oftast að leyna gleði sinni..



 Nú er það sáðbygg sem fyrst fór niður farið að kíkja upp í vorkuldana og það verður jafn spennandi nú og ævinlega að fylgjast með því og spá í uppskeruhorfur fram á haustið.



 En þá byrja skemmtilegheitin fyrir alvöru.

 Norðanáttin var 0 m. en manni fannst samt kalt að koma út.


Þegar sólin kíkti upp fyrir Rauðukúluna hlýnaði samt strax.



 Þessi var líkleg með að vera að byrja lambsóttina þegar ég laumaðist inn í kaffi. Stundum gerist þetta ótrúlega hratt og hún var svo komin með 2 hrúta þegar ég kom til baka. Ein vinkonan gerði sig svo líklega til að stela a.m.k. öðru frá henni.



 Hér er samt allt komið í rétta gírinn og þó þetta sé ekki 5 stjörnu mun fara vel um þessa litlu fjölskyldu hér, allavega næsta sólarhringinn.



 Gnarrmamman( uppáhaldshrúturinn) bar fyrr í nótt og varr fyrsta þrílemban þetta vorið. Ég hefði nú verið ágætlega sáttur við tvö.



 Hluti af fæðingardeildinni sem er óðum að fyllast.



 Þeim líður svo alveg ógeðslega vel á þurru taðinu yfir nóttina en svo fá þær að sóla sig útivið að deginum þessa sólardaga.



 Gemlingunum er farið að fækka í krónni sinni 4 geldir komnir út og slatti borinn.



 Og það sést ein og ein handfangalaus í hópnum. Það er fötlun sem er svosem ágæt um sauðburðinn.