18.01.2013 22:15
Endalausir áfangasigrar og botnlaus heilabrot.
Hægt og sígandi er verið að vinna á því sem eftir af framkvæmdalistanum.
Það var að vísu farið rólega af stað eftir jóladæmið en núna er aðeins farið að gefa í því hundatamningarnar bíða handan við hornið.
Við vorum með bráðabirgðarbrynningar bæði hjá geldneytunum og fénu og höfum verið í að leggja alvöru lagnir til þeirra.
Eftir nokkra íhugun var farið í John Guest lagnaefnið og það verður að segjast eins og er að þetta lagnaefni er rosalega skemmtilegt og einfalt í lagningu.
Og þó ekki sé hægt að tala um að eitthvað sé ódýrt í byggingarbransanum þá ætla ég ekki að kvarta yfir verðlaginu á þessu miðað við annað.
Hér er farið inn í fjóslögn til að ná vatni fyrir geldneytin og síðan er það bara fittings í vasann, töng í hendi til að klippa niður rörin, svo er þessu raðað saman án annarra verkfæra.
Ef þarf að fara í lögnina eða breyta henni seinna, er hægt að smella þessu öllu sundur með berum höndum.
Það var farið í galvandæmið í lögnina þar sem kvígudótið nær að djöflast í þessu svo maður gat rifjað upp gamla kerfið.
Stálvír strengdur milli stoða til að halda plastinu uppi.
Það var svo splæst í gömlu góðu brynningarskálarnar hjá rollunum, þvi taðhúsin þola illa sulluganginn sem fylgir stútabrynningunni. Þegar gangar og gjafaplattar voru steyptir henti ég 25 mm. lögn í steypuna og það er skýringin á þessu svarta röri.
Atli átti alltaf eftir að klára rúlluklóna sem hann smíðaði í yfirstærð því við erum með 140 cm rúllur.
Það var ágætt, því þegar búið var að vera með hana í höndunum ófrágengna í einhvern tíma var hægt að hanna lokastigið á henni svo allir yrðu kátir.
Hér er niðurstaðan og þar sem við höfum ekki kynnst öðrum útfærslum á því hvernig klónni ert haldið opinni, trúum við því að þetta sé toppurinn.
Og eins og við höfum margrekið okkur á í þessari framkvæmd , erum við að verða alveg djöfull góðir í einhverju þegar það er búið og þarf að fara að hugsa um eitthvað nýtt.
Skrifað af svanur
