Blog records: 2010 N/A Blog|Month_5
30.05.2010 07:25
Hestapest,tamningar og ferðaþjónusta.
Það er ljóst að hún mun setja verulegt mark á væntanlegt landsmót, útiloka margan kostagripinn frá þátttöku ásamt því að einhverjir sýningagripirnir munu vera talsvert frá sínu besta.
Hér í sveitinni eru reknar tvær öflugar tamningarstöðvar þar sem öll starfsemi hefur legið niðri í margar vikur og sér ekki fyrir endann á því.
Hótel Eldborg gerir að stórum hluta út á hestamenn sem koma með hrossin, gista nokkrar nætur og taka síðan dagstúra frá hótelinu.
Það er eiginlega sama í hvaða átt er riðið frá hótelinu, allstaðar bíða klassareiðleiðir hvort heldur riðið er til fjöru eða fjalls.
Júní sem var mikið bókaður hjá hestahópum er allur afpantaður vegna veikinnar.
Sama staða er hjá bændunum sem hafa boðið upp á næturhólf fyrir ferðahrossin.
Þeir sem gera út á hestaferðirnar naga neglurnar og krossleggja fingur að ferðahrossin verði nú komin í stand þegar túristarnir mæta.
Það versta er trúlega það, að enginn virðist vita hvað raunverulega er í gangi hjá hrossunum.
Síðast en ekki síst er rétt að nefna það, að mín árlega hestaferð sem farin hefur verið milli sauðburðar og grenjavinnslu hefur verið frestað um óákveðinn tíma.
29.05.2010 19:19
Niðurstöður kosninga í Eyja- og Miklaholtshreppi.
Fyrstu tölur birtar án ábyrgðar.
Á kjörskrá voru 97. Alls kusu 90 eða 92.8 %
Eftirtalin hlutu kosningu í sveitarstjórn..
Halldór Jónsson 61 atkv.
Guðbjartur Gunnarsson 49 atkv.
Hrefna Birkisdóttir 45. atkv.
Þröstur Aðalbjarnason 39 atkv.
Sigurður Hreinsson 38 atkv.
27.05.2010 07:30
Sauðburðarlok.
Síðasta ærin bar í nótt og er þetta trúlega í fyrsta sinn í búskaparsögunni sem sauðburði lýkur fyrir maílok.
Þessi sauðburðarhrota fær góð eftirmæli, enda farið saman velgengni í lambahöldum og frábært vor.
Ekkert lamb hefur misfarist svo vitað sé sem hefur komist almennilega á lappirnar.
Spáin mín um mikla frjósemi þetta vorið gekk ekki eftir, þó þetta endaði nú ásættanlega.
Það voru reyndar 10 þrílemdar af þessum rúmu 100 fullorðnu en 16 einlembdar sem er óvanalega dapurt.
Greinilega hefði þurft að taka tvævetlurnar fyrr í haust og dekra aðeins við þær svo þetta yrði í lagi.
Þar sem sú síðasta sem bar var tvílemd, er ljóst að síðasta þrílemban verður að ganga með þremur eins og tvær þær fyrstu en það tókst að venja undan hinum þrílembunum og tvílemdu gemsunum svo einlembuhópurinn var nú ekki alvondur.
Þessar hér voru á leið í fjallið fyrir rúmu ári síðan og ekki verður sleppt seinna í ár.
Vorverkin eru á fínu róli og aðeins eftir að bera á nokkur " rollutún" og síðan tún hestamiðstöðvarinnar.
Það er reiknað með morgundeginum í það, og búið að panta smárigningu í framhaldinu.
Reyndar er orðið býsna þurrt um eftir langan þurrkakafla en ég vorkenni okkur vestlendingunum ekkert, en bændurnir á öskusvæðunum þyrftu hinsvegar að fá alvöru rigningar í smá tíma til bæta eitthvað ástandið þar.
Og það er aðeins að lifna yfir kosningarumræðunni í sveitinni. 
