Færslur: 2016 Desember
28.12.2016 13:37
Vorfílingur í skammdeginu.
Alltaf gaman að rifja upp hundavideóin í skammdeginu þegar úrillar jólalægðirnar leika sér við húsið mitt á a.m.k. 40 . .
Hérna er verið að færa lambfé á milli hólfa þar sem m.a. þarf að fara yfir þjóðveg.
Í dag eru breyttir tímar og þarf að sæta lagi árla morguns í slík ferðalög til að losna við tillitslausa ökumenn.
Já ,- það finnast nú reyndar enn ökumenn sem stoppa í góðri fjarlægð og hafa gaman af að sjá lambfé og hunda.
Trúlega gamlir sveitamenn eða fyrrverandi snúningalið .
Síðast í myndbandinu eru tvær einlembur teknar úr hópnum áður en hann fer í tvílembuhólfið.
Slóðin á myndbandið HÉR
Skrifað af svanur
19.12.2016 20:00
Að meta fjárhunda og kaupendur...
Í gegnum tíðina hafa orðið til hjá mér hundar sem ekki henta mér í ræktun eða vinnu.
Hafi þeir verið til einhvers nýtir hef ég komið þeim í hendurnar á einhverjum sem ég treysti fyrir þeim og veit að geta notað þá.
Enda oftast ágætir eða þannig .
Verðið hefur þá verið fundið út eftir notagildi hundsins og greiðsluvilja kaupandans.
Það verður hinsvegar uppi gjörólík staða þegar farið er í að rækta, ala upp og temja hund með sölu í huga.
Þá verða hlutirnir að ganga upp til þess að maður nenni að standa í slíku.
Mín reynsla í ræktuninni er sú að þó paraðir séu saman góðir vinnuhundar sem ég gjörþekki er hvolpahópurinn misjafn.
Engir tveir eins.
Gróf þumaputta regla er sú að í t.d. 6 hvolpa goti eru 2 jafngóðir eða betri foreldrunum.
Tveir eru ágætir en 2 síðri.
Auðvitað ekki nákvæmlega svona enda passa einstaklingarnir alltaf misjafnlega saman í ræktun.
En í þessa áttina.
Rétt er að taka skýrt fram að langflestir ræktendur sem ég spyr um útkomuna hjá, koma alveg af háfjöllum að heyra þetta. Þeir eru ekki að lenda í þessu.
Sem er frábært fyrir þá og kaupendurnar.
Sem segir mér bara að ég sé ekki mjög góður í þessu frekar en öðru.
En aftur að verðlagningunni.
Ég met það alveg blákalt hvað hafa þarf útúr dæminu til að hægt sé að standa í þessu.
Hvolpsverðið er metið það sama hvort sem ég kaupi hvolp eða el hann upp.. Um 100.000 ( Allar tölur án vsk.)
Myndi annars selja þá á það.
Uppeldið og tíminn þar til hundurinn er seldur 15 - 20 mán.kostar mig a.m.k um 140.000 + í fóðri.
Fjögurra mánaða tamning kostar 200.000.
Sem sagt, svo ég sé ekki farinn að borga með sölunni verður 6 hvolpa hópurinn að jafna sig upp með 440.000 kr meðalverð.
Lágmark.
Sem þýðir það að svona samsettur hópur þarf að fara á 300-500.000 .
Og miðað við markaðinn eins og ég met hann í dag gerir hann það.
Þetta er samt ekki svona einfalt því bestu/dýrustu hundarnir eru gjarnan öflugri og fyrirferðameiri í tamningu og þurfa gjarnan lengri tíma.
Stundum væri betra ef ég gæti haft þá lengur , helst yfir haustvertíð til að slípa þá í vinnu. Ég held samt að markaðurinn þoli ekki töluna sem þá sæist á reikningnum.
Það mun hinsvegar gerast áður en langt um líður. A.m.k ef miðað er við hvað þessi mál hafa þó þróast hratt síðustu árin.
Og sumir verða aldrei metnir til fjár 
Þetta upphugsaða dæmi hér að ofan sýnir útkomu sem stendur algjörlega í járnum .
Dæmi sem getur gengið meðan verið er að þróa hlutina en ekki til langframa.
Og talandi um markaðinn, er orðinn til hópur sem skilur um hvað málið snýst og er tilbúinn að borga talsvert fyrir rétta hundinn.
Þeir sem eru fastir í 250 - 300.000 kallinum( mjög stór hópur enn ) kaupa væntanlegu gölluðu eða getuminni hundana eða verða sér útum hvolpa til að ala upp og temja, rétt eins og bændurnir hafa verið að gera síðustu aldirnar.
Já og þessar vangaveltur eiga að sjálfsögðu einungis við undirritaðan og hvernig hann metur stöðuna.
Og já ,- þetta er nú annars allt að koma 
.
.Skrifað af svanur
09.12.2016 20:35
Fjárhundar og verðráðgjöf.
Stundum , - ekki oft
er ég spurður um hversu mikils virði einhver tiltekinn hundur gæti verið ? Kannski verið að spá í sölu, nú eða kaup á hundi á mismunandi tamninga og gæðastigi.
Flestar eru þó fyrirspurninrnar þegar slys verður og viðkomandi eigandi er kominn í viðræður við tryggingarfélag um bætur.
Óþarft er að taka fram að ég verð mjög var um mig við slíkar spurningar.
Sérstaklega ef um kaup eða sölu á lifandi dýri er að ræða 
.
. Stórhættulegt að lenda þar á milli steins og sleggju ef svo má að orði komast 
Ef um tryggingarbætur er að ræða er þetta kannski einfaldara.
Sum tryggingarfélaganna samþykkja að verðmæti hunds séu kostnaður með kaupverði hvolps,tamningu og annars sem færð eru rök fyrir.
Fullyrðingar um að hundurinn hafi verið ómetanlegur vegna afburða hæfleika og sv. frv.. ganga verr.. Áætlað markaðsverð er þá vinsælt markmið hjá félögunum og geta orðið nokkur skoðunarskipti um það. .
. Þá er gott ef t.d er til myndband af hundinum í vinnu, reikningar fyrir tamningavinnu, - og kannski fengin umsögn tamningamanns þ.,e.a.s. ef hún er jákvæð 
..
.. Þrautaráðið getur samt verið að setja upp kostnaðinn frá upphafi.
Kaupin, uppeldið ,eigin tamningarvinna og árlegan kostnað vegna fóðurs og annars. Mjög auðvelt að reikna sig upp þau í hundruði þúsunda sem dýrið kostar í raun og eigandinn þarf að kosta til við að koma sér upp nýjum hundi.
Hvað sem öðru líður hefur orðið veruleg viðhorfsbreyting hjá a.m.k. sumum félaganna og ásættanleg niðurstaða auðfengnari en áður, ef boginn er ekki spenntur til hins ýtrasta 
.
.Þetta blogg átti nú að vera um það hvernig ég verðmet hundana sem ég sel á mismunandi tamningastigum.
Er greinilega kominn út í móa með það.
Tek það bara í næsta bloggi 
.
.Skrifað af svanur
- 1
