07.08.2014 21:21

Já,já. Nú er það hundablogg.

Hundurinn hljóp snuðrandi um gerðið án þess að líta á kindurnar.

Svo tók hann sig til, reisti skottið og hljóp gjammandi að þeim. Snuðraði síðan aðeins meira og merkti sér eitthvað yst í gerðinu.

Hann er ekki hreinræktaður sagði ég. ( Spurði ekki ) .

Nei nei sagði unga stúlkan , mamma hans er hálfur íslendingur. Samt góður smalahundur sögðu ræktendurnir.

Pabbinn er svo auðvitað alveg frábær fjárhundur sagði ég.

Já sagði stúlkan . Hvernig vissirðu það spurði hún svo.

Nú, foreldrarnir eru alltaf frábærir fjárhundar meðan verið er að selja hvolpana undan þeim sagði ég glaðhlakkalega.

Ekki er verið að skrökva um það spurði stúlkan hneyksluð. Ég yppti öxlum. Í sumum tilvikum og síðan er ákaflega misjafnt hvað fólki finnst vera góðir hundar .

Sumum finnst hundurinn sinn vera afbragðsgóður þegar öðrum finnst að hann eigi ekki að vera með í smalamennskum.

Hvernig líst þér á hann spurði stúlkan og leist greinilega ekki alltof vel á þetta umræðuefni. Aðspurð var hún búin að segja mér að hundurinn væri rúmlega tveggja ára.

Ég horfði spekingslega á hundinn og ákvað að segja henni umbúðarlaust að ég héldi að hann yrði aldrei til nokkurs gagns við kindavinnu, en benti eins og vanalega á að þetta væri nú bara mitt álit.

Stúlkan hafði greinilega átt von á einhverju í þessa áttina því hún spurði einskis frekar um hundinn.

Hún spurði hinsvegar hvort hún væri örugg með gott efni, ef keyptur yrði hreinræktaður Border Collie.

Nei, hún væri nú kannski aldrei örugg með gott efni en líkurnar á góðu fjárhundsefni færu ört vaxandi eftir því sem gæði foreldranna væri meiri.

Gæti ég kannski lent á einhverjum svona, þó hann væri hreinræktaður spurði stúlkan með vantrúarhreim.

Ég svaraði þessu ekki beint en sagðist vera þeirrar skoðunar að svona u.þ.bil 30 %

" hreinræktaðra " hunda væri ónothæfir í alvörufjárhunda.

Tók síðan fram að á bak við þessa skoðun lægju engar vísindarlegar kannanir.

Reyndar hefði ég haldið mig við þessa prósentutölu í fjölda ára og hefði aldrei þorað að hækka hana þó ég væri mun betur inni í " ræktunarstarfinu" nú en áður.

Ekki dygði að fá alla border collie ræktendur í manndrápshug í bakið á mér. emoticon

Nú var stúlkan orðin dálítið ringluð á svipinn sem vonlegt var, enda búið að flækja málið verulega fyrir henni.

Ég huggaði hana því með að kannski væru um 60 % + hvolpanna góð eða sæmileg efni og ef hún kynnti sér foreldrana vel eða fyrri got þeirra, þá væru nú líkurnar orðnar nokkuð góðar .

Og svo óskaði ég henni góðs gengis í hundamálunum.

Og nú verður allt vitlaust emoticon

Skrifað af svanur

Tengill á færslu

Bæta við áliti

Sýna álit

30.07.2014 20:36

Slæmt, vont og verra.

Sumarið 1983 var frekar önugt til heyskapar, stöðugir óþurrkar og vandræði.

Þó ég hefði þá heyjaði mestallt í vothey átti það að vera aðeins forþurrkað sem reyndist ekki í boði.

Ég gerðist spámannlegur um haustið og huggaði mig og aðra með því að þetta árferði gæti ekki versnað.

Þó ég hafi verið enn spámannlegar vaxinn þá en nú reyndist næsta sumar þó verða mun verra, kaldara og rigningarskýin mun öflugri

.Algjört vibbasumar .

Á þessum tíma var ekki sturtuvagn í dótasafni bændanna frekar en svo margt annað og það var ekki nóg með að mýrartúnin væru eins og gljúpur svampur heldur þurfti gjarna tvær dráttarvélar til að koma vagninum heim með einhverja hungurlús af heyi í gryfjuna.

Já þetta voru virkilega vond sumur. Þó tækni, túnavegir og tún hafi gjörbreyst frá þessum tíma eru menn alls ekki að ráða við svona sumur.

Góðu vanir gera menn kröfur um fyrsta flokks grasfóður en það verður ekki í boði næsta vetur í langflestum tilvikum, sérstaklega sunnan og vestanlands.

Hér er verið að slá síðustu spildu fyrri sláttar. Gríðarleg uppskera með afar lágu fóðurgildi

Nú er loksins brostinn á nokkurra daga þurrkur og stefnir í lokasprettinn hjá mörgum með fyrrislátt.

Reyndar er blásturinn í kröftugra lagi hér og ekki óliklegt að einhverstaðar fjúki hey. Það lækkar þá plastkostnaðinn sem verður óhóflegur utan um allt þetta heymagn með allt of fáum fóðureiningum.

Já það er ljóst að menn eru með lakara fóður en sést hefur í langan tíma. Misjafnlega úr sér sprottið og með lægri þurrefnisprósentu en flestir kjósa. Magnið verður samt trúlega vel umfram meðaltal og þar sem lystugleikinn verður slakur munu menn búa vel með fyrningar næsta vor. ( Halda plúsunum til haga )

Sem betur fer ná menn vel að halda haus vegna veðráttunnar en afkoman verður þó slakari næsta árið vegna minna afurða og meiri kaupa á aðfengnu kjarnfóðri.

Það er svo dýrmæt reynsla fyrir þá bændur sem ekki hafa kynnst alvöru rigningarsumri að spreyta sig á einu slíku.

Það var plægt upp lélegt tún sem er innan sauðfjárhólfsins á bænum og verður sáð í það blönduðu grasfræi næstu einhvern næstu daga . Aðeins að hressa uppá vor og haustbeit.

Svo er verið að safna saman hrossum til að beita mýrlendið í hólfinu því sinubruni er ekki inni lengur.

Já , grasið er ýmist of eða van rétt eins og rigningin. emoticon

Skrifað af svanur

Tengill á færslu

Bæta við áliti

Sýna álit

08.07.2014 20:56

Hæðarleysið yfir Grænlandi og ???

Í árdaga meðan ég var enn blautur á bakvið eyrun í búskapnum upplifði maður reglulega óþurrkasumur.

Stundum sumar eftir sumar.

Þá dugði ekki sólarglæta í 1 - 2 daga til að bjarga málunum . Það tók langar tíma að slá , þurrka og hirða og nefndu það bara. Og að sjálfsögðu var ekki í boði að setjast við tölvuna og skoða veðurspár hjá nokkrum spámiðlum og kannski nokkrar vikur fram í tímann.

Reyndar kannski ekki svo mikils virði á þessum síðustu og verstu að liggja yfir misónákvæmum spádómum.

Eitt það fyrsta sem ég lærði í spádómsfræðunum var að hæð yfir Grænlandi var bjargvætturinn í óþurrkinum. Hæð yfir Grænlandi var ávísun á norðanátt og þurrk. Hún var málið.

Henni fylgdi að vísu lotteríið um hraðann á norðanáttinni. Ef hún var mikið að flýta sér gat tilvonandi heyforði endað í nærliggjandi skurðum og girðingum., en þá eins og nú er lítið gaman að lífinu ef engin er áhættan.

Þó allt fari í hring er heyskaparbasl þessa tíma að baki og nú er málunum reddað á örfáum dögum , næstum milli skúra.

Ungu bændurnir sem ekki hafa kynnst alvöru óþurrkasumri ná ekki upp í það að allt í einu er grasið farið að spretta úr sér . Og enginn þurrkur í kortunum. Túnin orðin undarlega mjúk yfirferðar og annað eftir því.

Og litlu hægt að ráða þurrkstiginu á heyinu við rúllunina, í plast skal það með góðu eða illu ef gefur þurran dag.

Allt er jú hey í harðindum eða þannig .

Hér á bæ er nú verið að ljúka þriðju heytörninni. Nú voru nærri 3 þurrir dagar í boði og gærdagurinn bara mjög fínn til síns brúks.

Þar sem féð er á taði verður að gera talsverðar kröfur um þurrefnisprósentuna í heyi fyrir það.

Þá dugar ekki annað en knosaravélin við sláttinn og það lá við að ég væri bara nokkuð sáttur við þurrkstigið þegar það small í plast áðan.

Og þó heyforðinn sé kannski aðeins ofþroskaður og í rakara lagi þá sleppur þetta vonandi til og er kannski bara mjög gott ef miða á við hæðarleysið yfir Grænlandi og helv. lægðarganginn sem er að læðast að okkur aftanfrá eða úr austri.

Svo ekkert misskiljist þá var vorið náttúrulega með eindæmum gott. Grasspretta alveg með fádæmum, en byggspá ársins sem byggist á sólarlitlu rigningarsumri, - segist ekki. Enda byggið engin votlendisjurt og ljóst að frábært vor mun ekki duga til að tryggja góða uppskeru emoticon

Skrifað af svanur

07.08.2014 21:21

Já,já. Nú er það hundablogg.

30.07.2014 20:36

Slæmt, vont og verra.

08.07.2014 20:56

Hæðarleysið yfir Grænlandi og ???

Vafraðu um

Tenglar