Sindri frá Keldudal er 3. vetra. M. Ísold frá Keldudal en hún ,móðir hennar og amma hafa allar fengið heiðursverðlaun fyrir afkvæmi. Faðirinn er Hágangur frá Narfastöðum sem mun standa í ströngu á komandi Landsmóti.

  Svo er bara að bíða og sjá hvernig genin hafa raðast í folann en þar er nú aldrei neitt fast í hendi eins og menn vita. En geðslagið er gott og hann fer aðallega um á brokki og tölti. Og nú er hann mættur í sumarvinnuna sem er dálítið ólík vetrarvinnunni sem bíður hans.

  Það verður svo kannski rennt á mótið og fylgst með pabbanum og Ingólfi náttúrulega.

   Það tókst að koma öllu í plast í gærkvöld og nú verður smá pása( stutt) í heyskap þegar verður búið að koma rúllunum heim. Það er ekki hlaupið að því,  vegna umferðarþungans sem er hér um helgar. Þessvegna verður að sæta lagi fyrripart dags, sérstaklega með það sem flutt er hér neðan af túnunum því annars getur orðið löng bið eftir lagi að komast þvert yfir þjóðveginn. Kýrnar þurfa líka að þvera þjóðveginn á leið í daglega beit . Stundum hvarflaði að manni að halda þeim heima um helgarnar en nú er augunum bara lokað og hliðið opnað, svo er bílstjórunum bara veifað kankvíslega þegar sú síðasta er sloppin yfir. Það tekur nefnilega smástund fyrir 45 kýr að lesta sig yfir og ég get fullvissað ykkur um það, að þær eru ekkert að flýta sér blessaðar.
  Og blessaðir hundarnir eru að sjálfsögðu í stöðugri lífshættu en hér gerir enginn neitt nema með aðstoð þeirra.
  Það má segja þessum taugaveikluðu og stressuðu ökumönnum til hróss að 99 % þeirra láta þetta yfir sig ganga möglunarlaust og smáfólkið fær þarna kærkominn bónus á helgarferðina. Bónusinn sem bílstjórarnir fá getur hinsvegar orðið öllu verri , því ef þeir ætla að bæta sér upp töfina, er nokkur hætta á að eftir nokkra km. fái þeir á sig blá ljós og misháa sekt eftir því hvað þeir ætluðu sér að ná töfinni hratt til baka.

 Já, það er vandlifað í henni veröld.

  Þó ég sé afdráttarlaus talsmaður þess að smitvarnir séu í heiðri hafðar til varnar þessum viðkvæmu landsnámsstofnum okkar hér á skerinu, (sérstaklega kúnum) fannst mér broslegt hversu ríkulegur afsláttur var veittur í sóttvörnunum þegar "Búrið góða" var flutt inn. Það hefur komið fram að engin sótthreinsun var framkvæmd á því fyrir innflutninginn heldur var það tekið beint úr geymslunni í dýragarðinum þar sem það stóð " sótthreinsað " eftir síðustu notkun og flutt beint að Hrauni á Skaga. Engin sótthreinsivottorð fylgdu því heldur voru orð yfirdýralæknis  dýragarðsins látin duga um ástand þess og sótthreinsun.Kannski var það sá sami og stjórnaði hinum vel grunduðu og velheppnuðu aðgerðum á Hrauni?.  Búrið er síðan úr timbri en það er afdráttarlaust í lögum að sótthreinsun á timburbúrum dugi ekki , þeim skuli eytt. Sama á við um öll timburverk í innfluttum tækjum eða búnaði  sem notuð hafa verið erlendis. Og möppudýrin og kerfiskallarnir bíta svo höfuðið af skömminni með því að upplýsa að nú sé búið að sótthreinsa græjuna og kerruna sem flutti hana enda sé það síðan geymt á " traustum " stað.

  Það allra skemmtilegasta í málinu er þó að tveir banghagir menn reka saman svona kassa á örfáum klukkutímum.

 Og svo vildi ég gjarnan að Bangsi no. 3 fari nú að birtast svo góða fólkið hafi eitthvað að hugsa um og nefndin fari að klára aðgerðaáætlunina sína sem mun verða mjög djúpt hugsuð og skynsamleg..
( Bara að löggan verði nú ekki til vandræða í nefndinni.?)