Við erum ellefu systkinin og þegar fermingarnar voru sem flestar í den sátum við 4-5 veislur sama vorið. Aldrei klikkaði þó skipulagningin þannig að veislurnar rækjust á hjá hinum skipulagða kvenlegg ættarinnar.

  Nú bar hinsvegar svo við að eitthvað fór úrskeiðis, eða eins og einn orðaði það, að nú ræður hin frjálsa samkeppni, allavega bárust okkur systkinunum með stuttu millibili boð í tvær giftingar á sama tíma og sama dag. Önnur austur í Mýrdal en hin í Reykjavíkinni. Og voru nú góð ráð dýr. Hér í Dalsmynni vorum við í tiltölulega góðum málum. Ættmóðirin var send í Reykjavíkurveisluna en ég fór í Mýrdalinn ásamt minni heittelskuðu. Giftingarnar fóru síðan fram með miklum stæl kl. 4 á laugardeginum. Síðan hittist systkinahópurinn allur(nema Skabbi )  í sextugsafmæli Möggu systur á Vatnskarðshólum á sunnudeginum en það var einmitt Eva dóttir hennar sem gekk að eiga hann Fúsa sinn daginn áður. Í Reykjavíkinni voru það Gummi og Nína sem gengu í það heilaga og til hamingju með þetta öllsömul. Ég ætla svo ekkert að lýsa því nánar hvað gengur á þegar systkinahópurinn nær  saman.

  Það var búið að spá roki og rigningu á suðurlandinu og þessvegna var ákveðið að taka góða veðrið af Nesinu með austur. Þeir Mýrdælingar litu hinsvegar oft til lofts um helginu og skildu ekkert í þessu rigningarleysi. Þeir bölvuðu þó veðurfræðingunum tiltölulega lítið fyrir spámennskuna  í þetta sinn, enda sýndist þetta allt standa til bóta með rigninguna, um það er við Snæfellingarnir yfirgáfu svæðið seinnipart sunnudags.

  Það er svo væntanlegt myndablogg frá helginni.

              Rigning og sól = regnbogi.  Svona var veðrið í morgun en svo birti til og var þurrt í dag.  Nú er gamli góði Camperinn loksins kominn á pikkann en pallhúsið þarna farið. Stefnan er svo sett á Mýrdalinn um helgina og hugsanlega verður sunnlensk rigning til að kæta/væta mann eftir alla þurrkana.
 


     Trúlega síðasta háarrúlla sumarsins komin á flug. Fyrir Valtra aðdáendur er gaman að upplýsa það, að samkvæmt nýjustu tölum er hann söluhæsta dráttarvélin á landinu það sem af er árinu en dráttarvélasala mun vera helmingi minni en á sama tíma í fyrra.
 Ferguson aðdáendurnir geta svo huggað sig við að Fegginn kemur í hælana á honum.

  Svo samhryggist ég okkur sauðfjárbændum með fyrstu verðtölur haustsins.
Ef þær lagast ekki verða menn að fá sér axlabönd með beltunum. 

    Loksins fór síðasta hey sumarsins í plast í dag. Það urðu um 130 rúllur ( alvöru  rúllur 140 cm ) mest há en einnig rýgresi. Síðan var það hreinsunin af beitartúnunum sem er reyndar ekki alvörufóður og endar á borðum útigangsins.Það er að vísu fyrirvari með "síðasta" því rýgresið á eftir að ná einni sprettu enn og verður ákveðið á síðari stigum hvort það verður beitt eða slegið. Þær eru orðnar eitthvað á annað þúsundið rúllurnar í Dalsmynni og hestamiðstöðinni og þó þetta sé sitthvort dæmið þjást menn hvor með öðrum ef illa gengur, en eru hamingjusamir saman á góðu sumri eins og þessu.
 Þó litlu munaði að rigndi ofaní múgana í dag slapp það til, og eins og áður hefur komið fram, hefur svona sumar ekki komið, svo lengi sem elstu menn muna.
 Þeir sem búa við .þurrlendari tún eða voru seinir til með áburðargjöfina hafa farið illa útúr þurrkunum og spurning hvort mela/sandatún heiðgul af þurrkbruna muni ná sér aftur á strik.

 En nú er farið að rigna.