Ég lét mig hafa það í gærkvöldi að setjast niður og fylgjast með frambjóðendunum í kjördæminu mínu,  takast á í beinni útsendingu.

 Þetta var hin skemmtilegasta afþreying og gaman að sjá hvernig menn komust frá þessum fyrsta slag í þessum stutta kosningarhasar.

 Ásbjörn vinur minn átti greinilega í vök að verjast, enda þurfa stjórnarflokkarnir ekki á kosningarbaráttu að halda, meðan félagar hans á alþingi eru haldnir jafn ríkri sjálfseyðingahvöt og þjáir þá þessa dagana. Hvað sem má um stjórnlagafrumvarpið segja, er ljóst að þeim hefur gjörsamlega mistekist að koma sjónarmiðum sínum á framfæri og nú standa þeir í biðröð við ræðustól Alþingis til að skjóta sig í fótinn.

  Þeir sem mér fannst koma skást út úr þessum fundi voru samfylkingin og borgaraflokkurinn. Þeir munu nú samt ekki höfða til mín á kjördag því samfylkingarliðið er nú eins og það er og mér finnst eins og Borgaraflokkurinn sé dálítið stefnulaus í flestum málaflokkum en trúlega mun hann sækja sig þessa daga fram að kosningum þegar gamla fjórflokkadæmið verður búið að spila gömlu rulluna rækilega aftur.

  Frammarinn stóð sig líka þokkalega en undirstrikaði það að stefna flokksins væri sú að gera engar breytingar í í kvótadæminu, allavega í landbúnaðinum , en ég þori nú ekki að fullyrða um fiskinn.
  Ég held/vona að kvótakjaftæðið til lands og sjávar í núverandi mynd sé í dauðateygjunum og skilgetnir foreldrar þess, sjálfstæðis og framsóknarmenn ættu að átta sig á því í tíma.
  Ef þarf að gera út á sóknar eða aflamarkskerfi er ekkert eðlilegra en það sé ríkið sem eigi réttindin og leigi þau út annarsvegar og deili út byggðakvóta hinsvegar.

  Í landbúnaðinum hef ég bent á það áður, að það er ekki endurnýjunarvænt að láta þá sem hætta, halda launum næstu ára með sölu á ríkisstyrkjunum til þeirra sem taka við.
 Það sjónarmið er náttúrulega ekki uppi í Skagafirðinum þar sem menn hafa verið duglegir að bjarga sér og látið greipar sópa um landið og miðin undir handarjaðri KS. 
  Frjálslyndir sem hafa staðið í ströngu eru líklega úti þessar kosningarnar og lýðræðið hans Ástþórs nær illa innfyrir hlustirnar á okkur sem erum í einhverjum öðrum heimi en félagi Ástþór.

  VG sem eru á fullu að endurforrita sig sérstaklega í evrópumálunum og reyndar fjölmörgum öðrum málaflokkum mun ganga misjafnlega að fóta sig í umræðunni um sparnaðar, niðurskurðar og skattaleiðir.

  Leitogi þeirra í kjördæminu toppaði líka fundinn þegar hann fór að lýsa því hvernig staðið yrði að niðurskurðinum og sparnaðinum.

  Að sjálfsögðu ætti að hlífa þessu kjördæmi við öllum samdráttar og niðurskurðaraðgerðum enda hefðum við misst af veislunni. Síðan yrði heilbrigðis og menntakerfið  auðvitað varið?? 



 Það er ekki nema von að við tengdamamma vitum ekkert hvað við eigum að kjósa. 

 

 

 

  Í svefnrofunum í gærmorgun heyrði ég einhver torkennileg hljóð utanað mér.

Mér fannst ég kannast við þau og það glaðnaði yfir mér í útkikki morgunsins að sjá stokkandaparið mætt á tjörnina.
 Þau höfðu verið að spjalla saman í fyrstu morgunskímunni ánægð yfir að hafa náð þessum áfanga enn einu sinni.

 

  Hjónakornin voru vör  um sig til að byrja með enda löngu búnin að læra það ( sem betur fer)  að engu er að treysta þegar mannsskepnan er annarsvegar.
  Til að forðast misskilning er rétt að taka fram að hér fyrir ofan eru þau að spássera á ís, því  þó  þau séu heilög hér,  er ekki gengið  á vatni enn.



   Hér er sú gamla að siða til annaðhvort dóttur sína eða tengdadóttir síðastliðið sumar.

 

 Hún hafði fullan sigur í þeirri viðureign án aðstoðar ektamakans og var mjög reigingsleg á svæðinu sínu á eftir.


   Steggirnir eru ekkert að skipta sér af svona innanríkisdeilum og eru nú yfirhöfuð slakir í uppeldinu. 

Þeir eru nú kannski ekki einir um það. 

 Já , þó aðeins hafi kólnað, þá er vorið handan við hornið.

  Það var stafalogn og hlýtt þegar ég gekk léttum fjaðurmögnuðum skrefum til gegninganna í morgunsárið.
 Það voru auðheyrilega miklir flotar af álftum og gæs á flugi  frá náttstað í akrana í  sveitinni.
Það er verið að hreinsa upp það sem fuglar og mýs hafa ekki komið í lóg í vetur og öllu friðvænlegra að eiga við það núna en á haustdögum.



 Eitthvað af þessum lifðu af hernað haustsins og eru mættar galvaskar í íslenska vorið.

  Það var ekki slegið slöku við í dag, því nú er allt að verða syngjandi vitlaust í sveitinni í endalausum verkefnum.
  Nú dugði ekkert góðviðriskjaftæði, heldur var lokið við að rýja féð. Þar sem ærnar eru tví eða margbreiðar hafa þær hlotið extra meðferð síðasta sólarhringinn til að auka líkurnar á að þær og bændurnir lifi þetta af.


 Þær eru skildar eftir í hálfullu til að gulltryggja að engar búsifjar verði af v.v.v. sýkingunni. Það kostar nokkurra klst. snyrtivinnu í haust en komi tímar og komi ráð.



 Amman og ömmustelpan mættu svo og byrjuðu óðara á að bæta þessum horrenglum upp lélegan viðurgjörning síðasta sólarhringinn.

  Amman og dótturdótirin brugðu sér síðan á Línu Langsokk suður í Brún. Þær gátu svo í hvoruga löppina stigið fyrir ánægju með sýninguna og hún Lína var alveg rosalega góð.


   Vonandi tekur sú stutta ekki upp ýmsa siði frá henni Línu.

  Já nú er vorið komið. - Þar til annað sannast.