Mamma sem er að verða 87 ára var í sveitinni um jólin.

 Annars dvelur hún á Dvalarheimilinu í Borgarnesi og er ótrúlega ánægð með sig þar en lengi vel kom ekki til greina hjá henni að yfirgefa sveitina.

 Hér er hún með heimasætunni í Dalsmynni en gamla konan á um 90 afkomendur og geri aðrir betur.
 
Allt toppfólk náttúrulega.

 Það var ekki nóg með að hún kæmi 11 börnum til manns, heldur minnist ég þess í uppvextinum  að oftast voru 2- 4 börn " í sveit " yfir sumarið, þó svona eftir á að hyggja skilji maður ekki  alveg hvernig þetta var hægt.



 Kolbrún skellti sér út í frumskóginn með pabba og jólatréð var sótt.



Langömmubörnin, Kolbrún og Aron koma fyrsta pakkanum fyrir á sínum stað.


Fyrir litla fólkið er borðhaldið alltaf of tímafrekt enda mikil vinna framundan.



 Það er rétt að hjálpa langömmu að opna pakkann sinn enda alltaf spennandi að sjá hvað er í þessum pökkum.



 Sumir voru nú ekkert að stressa sig á lengd borðhaldsins a.m.k. ekki þetta árið.

 Á laugardaginn kom svo allt í einu mikill ferðahugur í gömlu konuna en þó tókst fresta brottferð fram á sunnudaginn. 

 En veðrið í sveitinn er allt í einu orðið eins og það á að vera um jólin, logn og heiðskírt.

 Þó maður sé mættur í fjósið alla morgna kl.6.30 eru jólin samt tími mikillar slökunar og værukærðar.

 Allavega hjá þeim sem eru eingöngu í því að njóta veislufanganna sem verða til um jólin.

 Eg er nú reyndar ákaflega lítill jólamaður í mér og í endurminningunni er ljósi punktur jólanna allar bækurnar sem komu í gjafapökkunum til heimilismanna en þær voru allar lesnar næstu dagana.

 Nú eru breyttir tímar og trúlega eru þetta fyrstu jólin mín sem ekki kemur ný bók uppúr pökkum heimilismanna. Enn þá eitthvað 2007 í gangi eða hvað?

 Stærsta jólagjöfin í ár var að hafa öll ( eða þannig) börn og barnabörn hjá sér á aðfangadagskvöld en það væri daufleg pakkaopnun að hafa ekki börn við hendina til að útbýta pökkum og aðstoða við opnun þeirra. Kolbrún Katla var góð í því og Aron Sölvi bráðefnilegur.

 Jólamessan var svo í dag.

 Til að létta á kirkjukór, presti og fleirum var það ákveðið í fyrra að hafa jólamessuna sitt árið í hvorri kirkju, Fáskrúðarbakka og Kolbeinstaðarkirkju.

 Messað var í  Fáskrúðarbakkakirkju í fyrra og  Kolbeinstaðarkirkju í ár.

 Það var bara gaman að lenda í messu hjá vinum mínum á Austurbakkanum og meira að segja þó nokkrir mættir í jólamessuna  af báðum bökkum..

 Mér hafði reyndar verið sagt að vinir mínir á Austurbakkanum væru nú ekki með þeim allra kirkjuræknustu og mætingin í dag hefði nú verið nokkur hundruð % meiri en undanfarið, ég legg náttúrulega engan dóm á slíkar sögusagnir.

 Hitt sýndist mér, að þeir sem ekki mættu, hefðu nú trúlega haft síst minni þörf á  því að koma, hlusta á guðs orð og varðveita það.  ( Bara svona hlutlaust vinalegt álit undirritaðs.)

 Já þetta lítur bara vel út og verið að bóka kaffi og matarboð, hægri, vinstri.

Nú verður að safna smá forða til mögru áranna 7 sem í hönd fara.

 Já, það er bara boðið uppá myndalaust blogg núna því allir eiga að vera duglegir að lesa um jólin.

      Lesendur síðunnar  nær og fjær fá bestu óskir 
       um gleðileg jól og farsælt komandi ár.

      Sérstakar þakkir til þeirra sem hafa komið við  með  kommenti
       eða stimplað sig inn í gestabók.