Maður fær aldrei nóg af þvi að virða fyrir sér landslagið hvort sem það er nýtt eða notað, enda aldrei eins.

 Og það væri mun minna virði ef það héti ekki neitt.



 Hér eru Draugagilin séð ofan af Sanddalstungu. Hvernig stendur á nafngiftinni fæ ég trúlaga ekki að vita nema mæta aftur í leitir þarna.

Hér er horft suður Sanddalinn.Í fjarska sést Krókur sunnan Norðurár. Efsti bær í byggð i Norðurárdal.


 Hér sjást bílar Dalamanna og þeirra Hvammverja sem gengu efsta hluta Hvammsmúlagöngunnar á brún Svínagils.
Slóðinn sem þeir komu eftir sést liggja upp hæðina en hann kemur af veginum um Bröttubrekku.


Og hér neðar er sjálft Svínagilið. Það er leitað til suðurs af dalamönnum og taka sunnanmenn við því fé sem þar er.


 Austan Svínagilsins og rétt utan myndarinnar er Kaplagil en þar urðu eftir 10 kindur hjá Dalamönnum sem er það eina sem vitað var að yrði eftir í leitinni. Ekki nógu vel hundaðir!

 Enn austar er svo Illagilið sem ber nafn með rentu og er ekki reynt að ná fé sem tapast í það.



 Sprengibrekka  austast á myndinni( ljósa skriðan). Þetta svæði allt smala dalamenn til suðurs og taka sunnanmenn við fé af því svæði hér.

 Horft niður Norðurárdalinn af Hvammsmúlanum.



 Og til að skilja við ykkur á guðrækilegu nótunum kemur Hvammskirkja hér nýuppgerð.



Hér er kirkjuturninn kominn í upprunalegt form en hann var búinn að vera með allt öðru lagi áratugum saman.

 Hann Neisti frá Dalsmynni er um margt sérkennilegur hestur. Hann var nokkurra daga gamall þegar ég sá hann fyrst og mér er það minnistætt þegar folaldið tók sig út úr hópnum í réttinni og gekk hiklaust beint til mín og hnusaði af mér.

 Allar götur síðan er hann ákaflega ófeiminn við mannfólkið og fær stundum frekjuköst eins og móðirin.
 Ég man nú ekki af hvaða tilefni ég gaf minni heittelskuðu hann en kannski vegna þess að þetta er nú ekki akkúrat mín hestatýpa.
 Hann er varahestur no. 2 sem smalahestur og var járnaður með hraði þegar þessir alvöru hóstuðu hvor í kapp við annan þegar átti að fara að þjálfa þá upp fyrir leitir.

 Einn af sérstæðum hæfileikum Neista er að hann vippar sér léttilegi yfir skurðgröfuskurði í fullri breidd detti honum það í hug.

 Slíka hugdettu fékk hann í dag.



 Hann hefur ekki verið að vanda sig því þetta var bara vesaldarskurður sem gamli maðurinn gæti kannski hoppað yfir ef á þyrfti að halda.


Hér var hann nú alveg búinn á því en þar sem þetta er afrennsliskurður hitaveitunna var þetta þó bara notalega volgt.


Það er svo eins gott að hann verði ekki lengi með strengi eftir átökin því nú styttist óðfluga í að bóndinn fara að leggja á fjöllin í kringum sig.

 Oft hef ég á norðurleið rennt augunum inn Sanddalinn og heitið mér því að keyra einhverntímann þarna inneftir. Eins og um mörg önnur góð áform hjá mér hefur ekkert orðið úr því.

 Þegar Hvammsbóndinn hringdi í mig á dögunum og bauð mér í leitir tók ég því strax - í huganum, en dræmlega í samtalinu. Alltaf betra að láta ganga aðeins eftir sér.

 Laugardagurinn fór semsagt í það að smala Sanddalstunguna og Hvammsmúlann.

Og honum var ágætlega varið.


 Ég verð nú að láta þess getið í lítillæti mínu að í leitinni var slegið tvöfalt met. Tungan var leituð á skemmri tíma en dæmi eru um og leitarstjórinn minntist þess ekki að engin kind hefði sloppið á þessu svæði hér,  í fyrri leit.

 Hér er suðurendi Sanddalstungu, vestan hennar liggur Mjóidalur en Sanddalur að austan.
Þetta svæði er sakleysislegt að sjá og virðist auðsmalað en þegar fer að líða á leitina og féð er komið sunnarlega í dalina fer það að að leita upp og inneftir aftur.

 
Leitarslóðinn var nú býsna grófur á köflum en Sverrir og Patrolinn létu sig hafa það að koma leitarmönnum á gangnaskil.

Á leitarskilum borgfirðinga og dalamanna. Snjófjöllin í baksýn.

Ég mætti hinsvegar þungvopnaður til leiks á hjóli og með tvo alvöruhunda. Þetta teymi svínvirkaði svo á þessu svæði.

 Þarna kynntist ég nokkuð sérstæðum fjárstofni sem á nú samt trúlega ættingja hér vestra. Sjá hér.

 Þetta er ekki þykkvaxið fé,allt mislitt og í tveim - þremur reyfum. Það er ekki mjög félagslynt að eðlisfari og fer því gjarnan í allt aðrar áttir en kynsystur þeirra í leitum.



 Þessi hér að ofan er ágætt sýnishorn og rétt náðist á myndina þar sem henni lá talsvert á.

 Hér fyrir neðan  er hún svo komin til byggða en enn nokkuð sérsinna. Þetta eintak var alveg óvanalega mikil um sig og eðlileg í útliti miðað við frænkur sínar.


                                                                                                                                                                 Aðsend mynd.

Þessar kindur hlýddu samt hundunum sæmilega nema ein.

Ég veit nú ekki hvort hún ætlaði í hundana eða yfir þá, en óheppnin var með henni þennan daginn því bæði Vaskur og Snilld voru í útkallinu þegar hún lagði til atlögu.
  Mér sýndist hún vera á a.m.k. 70 km. hraða þegar hún yfirgaf átakasvæðið og stefndi meira að segja í hárrétta átt.

 Það voru uppundir tíu svona eintök sem létu hafa  fyrir sér en allar komust þær til byggða.

 Ég get svo reynt að friða alvöruvini landsins og gróðursins með því að fjórhjól á svona dekkjabúnaði og í höndunum á manni sem veit hvað hann er að gera, skilur eftir sig minni ummerki en tveir hestar.

 Hér er smalagengið svo komið yfir á Hvammsmúlann með Bauluna í baksýn. Þarna voru hundarnir ekki lengur orðnir til stórræðanna.

Það sem mér sýndist erfiðast í leitinni var glíman við að koma því fé sem lenti inn í skógarkjarrinu í Hvammsmúlanum áfram.

Þarna var verið að troða sér gegnum götulaust kjarrið og eins og leitarstjórinn sagði þurftu gangnamenn óspart á andlegri uppörfun að halda sem hann veitti þeim gegnum talstöðvarnar.

 Það er alltaf stór stund í lífi sauðfjárbóndans að sjá fé sitt koma af fjalli og hér er Hvammsbóndinn að yfirlíta hjörðina nokkuð sáttur við daginn.



Það munu væntanlega birtast hér landslagsmyndir úr leitinni áður en lýkur.