16.01.2017 21:26
RÆKTUN ÝMISKONAR.
Það eru kannski svona 6 ár síðan ég ákvað að hætta hrossaræktun.
Sex - sjö ára ferli til að komast að því að uppeldið mitt yrði ekki reiðhestur fyrir mig, var einfaldlega of langur tími.
Alltsvo fyrir menn komna á minn aldur . 
Sauðfjárræktin er miklu hraðvirkari .
Þar er hægt að gjörbreyta kjöt og ullargæðum á nokkrum árum ef menn tvíhenda sér í það.
Ja ,- kannski ekki bæði í einu. 
Hundaræktunin tekur þó öllu fram þegar menn fara að eldast og vilja sjá hlutina gerast á skikkanlegum hraða.
Hvolpar undan tík sem væri pöruð í dag yrðu farnir að sýna hvað í þeim býr eftir svona 8 - 10 mán.
Það hentar mér alveg prýðilega af ástæðum sem ég ræði ekki frekar hér. 
Þegar maður er svo kannski með 5 - 7 fjárhunda undir í tamningu, aukast gæðakröfurnar.
Hver stendur í því nema hafa eitthvað skemmtilegt undir ?
Það sem ég vil sjá í lærlingunum er í stórum dráttum það sama og ég vil sjá í vinnuhundum búsins.
Vinnufjarlægð sem er frekar of mikil en of lítil.
Mér finnst auðveldara að ná hundinum nær í vinnunni en ná honum frá ef hann vinnur þröngt.
Trúlega ekki allir sammála mér með það . 
Ég vil að áhuginn og ágengnin sé þannig að það þurfi að herða út í bremsurnar,- ekki vera með stöðuga hvatningu á nemandann.
Óþarfi að lýsa því hvernig kjarkgenum dýrið á að vera búið.
Ef ég er svo að temja fyrir mig, verður hausinn á nemandanum að vera í góðu lagi í daglegu umgengninni.
Já ,- þetta eru ræktunarkröfurnar , en þær nást náttúrulega aldrei. 
Ræktun fjárhunda er svo margslungin og auðvelt að lenda í ógöngum eða blindgötum ef einblínt er um of á eitthvað ákveðið.
Nú hafðist loksins af að flytja inn hund í ræktunina hjá mér á síðasta ári
.
Ég er kominn með ákveðna ræktunarlínu sem er skyldleikaræktuð að hluta og komin að endimörkum með ákveðna hluti .
Leitaði að hundi með tilliti til þess. Nú er stefnan sú að temja sjálfur allavega tvö got undan honum .
Þá verð ég kominn með marktækar vísbendingar um það hvort hann virkar í ræktun.
Þessi sýnishorn verða komin í ræktunarmatið eftir svona 7 mán. plús.
Hér eru svo slóðir á Sweep á ýmsum þroskastigum. Efst nokkur skot við tungumálaæfingar. Ekki sleppa síðustu 30 sekúndunum þar .
Skrifað af svanur
