Færslur: 2008 Desember
08.12.2008 23:38
Hrossaræktin í sveitinni.
Af þessum 75 folöldum á sýningunni var verulega hátt hlutfall af virkilega áhugaverðum gripum. Meira að segja ég sem hef ekkert vit á þessu sá það.
Taktur stóð undir nafni eins og sést á fótaburðinum hjá þeim félögunum.
Taktur Hágangsson frá Dalsmynni ( sá glófexti) komst ekki í 5 fola úrslitin þrátt fyrir að svífa um gólf á brokki og tölti.Hinir voru einfaldlega betri. Til marks um hvað stór hluti folaldanna var jafn, fékk hann 48 stig. Sá sem stóð efstur í folaflokknum var með 56 stig. Mér kæmi ekki á óvart að mjög stór hluti hópsins hefði verið með 45- 50 stig í einkunn.
Hjörtur Hágangsson og Ábóti Álfsson frá Söðulsholti fundu sig ekki alveg enda Ábóti síðkastaður.
Nú er ræktunin í Söðulsholti komin á nokkurt skrið þó ung sé að árum enda verið keyptar inn nokkrar 1. vl. hryssur.
Dís Tindsdóttir frá Hömluholti, sú ljósa fór á kostum en í Hömluholti er gamalgróin hrossarækt
stunduð af krafti.
Fáskrúðarbakkabúið mætti þarna með 7 folöld og flest til sölu . Þar er gamall og góður ræktunarstofn sem leynir á sér og þeir seldu grimmt á sýningunni.
Þarna fara þeir Hvinur og Ljómi mikinn en þeir eru undan Guðfinni Glymssyni frá Skeljabrekku.
Á Stakkhamri hafa verið ræktuð úrvals reiðhross eins lengi og elstu menn ( ég) muna og sú blesótta, Blika Sólonsdóttir á örugglega eftir að verða tekin til kostanna á fjörunum.
Það er mikill gangur í hrossaræktinni í Hrísdal og hér fara þeir Demantur Bjarmason ( skjóttur) og Eimur Aronsson hringinn sinn fyrir áhorfendur.
Blesa Flugarsdóttir frá Hjarðarfelli og Spóla Sólonsdóttir frá Stakkhamri á góðri siglingu. Harpa á Hjarðarfelli passar upp á hafa litaúrvalið í lagi með hæfileikunum.
Ólafur á Miðhrauni er líka að hasla sér völl í ræktuninni og hér fara þeir Hylur Álfsson og Straumur Gaumsson frá Miðhrauni.
Á Miðhrauni 2 eru Sigurður og Bryndís að skella sér í ræktunina og sá mósótti Töfrandi frá Miðhrauni 2 er undan Lokk frá Fellskoti.
Á Minni Borg eru bæði hrossin og húsfreyjan af mikilli eðalræktun frá Hofstöðum í Hálsasveit.
Hér fara þeir Mökkur frá Hofstöðum undan Korg f. Hofstöðum. (mós.) og Fagri Blakkur Frá M. Borg (f. Þrymur frá Þúfum) .
Já, það voru margi glæsigripir sýndir þarna og ég sem er nú alltaf á útkikkinu eftir reiðhestsefni sem þarf að vera öflugri en allt sem öflugt er og allt hitt í góðu lagi hefði sett þennan fola efst á listann yfir þá sem ég hefði vilja hafa eftir.
Hann heitir Bráður frá Miðgarði undan Sólon f. Skáney og Brá f. Stafholtsveggjum og lenti í þriðja sæti í folaflokknum.
Flottur.
Ef einhver rekur svo augun í einhverjar staðreyndarvillur hér fyrir ofan, fyrir alla muni látið mig vita.
07.12.2008 23:23
Mannlíf á folaldasýningu.
Það var talsvert á annað hundrað manns á sýningunni á hestasmiðstöðinni í dag og 72 folöld skráð.
Þetta er nú bara í þriðja sinn sem ég mæti á svona sýningu og mér er minnistæð sú fyrsta. Folöldin voru fín en tvennt fór í pirrurnar á mér . Annað var hve þetta gekk seint því alltaf var bið milli sýningahollanna. Hitt var mismununin sem sýnendurnir virtust sæta , því meðan það voru kannski 3 folöld í holli voru sum folöldin sýnd eitt í einu , sem var heldur ekki til að stytta sýningatímann.
Hestamiðstöðvarliðið sem var einnig þarna leit þetta sömu augum og þegar folaldasýningin var í hestamiðstöðinni í fyrra var þetta tekið föstum tökum, alltaf tvö folöld í sýningu í einu og sýningin gekk viðstöðulaust eða einungis nokkrar sekundur milli holla. Svona gekk þetta líka í dag en það var Hrossaræktarsamband Vesturlands sem sá um keppnina.
Meðan bóndinn afgreiddi áríðandi símtal fylgdust betri helmingurinn og tengdadóttirin áhugasamar með sýningunni.
Og það var verslað. Fáskrúðarbakkabóndinn( t.h.) kom með 7 st. þar af 5 skjótt undan Guðfinni Glymssyni og seldi a.m.k. 3. Ég held nú samt að hann eigi það besta eftir óselt og þarf að skreppa í kaffi til hans. Þessi í jakkanum er orðinn áskrifandi því hann keypti líka í fyrra.
Það komu til sýningar folöld frá 11 bæjum í Eyja- og Miklaholtshrepp og Hrísdalsbóndinn lék á alls oddi frá upphafi til enda, mættur með 7 st. hvert öðru álitlegra.
Afastelpunni leist alveg rosalega vel á verðlaunin- en hún átti ekkert folald.(Skil ekkert í mömmu hennar.)
Þá er bara að bjarga sér sem best maður getur.
Þessi lagði á sig lengsta ferðalagið og hlýtur að hafa verið nokkuð sáttur við úrslitin um það er lauk.
Þar sem ég er í fréttabanni( harður heimur bloggheimurinn) bíða flottu folaldamyndirnar betri tíma.
En kíkið á Söðulsholtssíðuna, þau sem hafa áhuga á hinni hlið sýningarinnar.
Svo tek ég þetta næsta haust.
07.12.2008 00:16
Aðventukvöld.
Það var vel mætt á hið árlega Aðventukvöld sem að þessu sinni var haldið í Lindartungu í umsjá sóknarnefndar Kolbeinstaðarsóknar.
Og hafi einhverjir borið kvíða í sinni vegna kreppunnar, hvarf hann sem dögg fyrir sólu .þegar séra Guðjón sem er að mæta til starfa eftir löng og erfið veikindi, fullvissaði okkur um að hann og umbjóðandi hans myndu beita sér fyrir því að margumrædd kreppa myndi allavega sneyða framhjá öllum bæjum í hans sóknum.
Börnin í kór Laugargerðisskóla sungu eins og englar en þetta eru vonandi eðlileg börn og eru kannski ekki alltaf eins og englar þess á milli.
Kirkjukórinn okkar söng svo af mikilli innlifun og kom okkur í endanlega jólaskapið.
Hafi svo vantað uppá réttu stemminguna hjá einhverjum, var Diddú mætt á svæðið og fór á kostum eins og henni einni er lagið.
Já það var greinilega eitthvað í gangi.
Og jólasveinninn var mættur og hlustaði líka á Diddú.
Þegar að söngveislunni lauk tók við mikil kökuveisla sem var mikil og góð æfing fyrir komandi jólavertíð.
Ég vil svo þakka margar góðar kveðjur til mín og heimasíðunnar minnar.
Þær eiga eftir að hressa við egóið hjá mér þegar ég sit við tölvuna með ljóðlínur snillingsins frá Skáholti í kollinum.
Ég sit hér einn, með sjálfstraustið mitt veika. o.sv. frv.
