Það mættu rúmlega 200 manns á ballið sem er mjög fínt.
Boðsballið er ævafornt fyrirbrigði og byggist á því að sveitafélögin ,Eyja og Miklaholtshreppur og Kolbeinsstaðarhreppur bjóða íbúum hvors annars á víxl. Það er ókeypis inn. flottur matur,skemmtiatriði og ball á eftir. Nú er Kolbeinstaðarhreppur orðinn hluti af Borgarbyggð en kerfið er samt óbreytt. Fyrst þegar ég fór að stunda boðsböllin  voru þetta "þurrar" samkomur en það hefur nú orðið " lítilsháttar "breyting á því í tímans rás. Á móti kemur svo að þeir sem reykja verða nú að fara út  til að fá sér frískt loft.
 Starfið í skemmtinefndinni komst fljótt í fastar skorður þegar líða tók að skemmtuninni.
Það voru  auðvitað konurnar sem sáu um framkvæmdina en við kallarnir reyndum að þvælast sem minnst fyrir. Reyndar vorum við ákaflega vel virkir á fyrsta nefndarfundinum og mun duglegri við að sinna veitingunum sem voru rausnalegar og urðum við því nokkuð tilllögugóðir þegar líða tók á fundinn. Einhverra hluta vegna fóru aðrir fundir fram með alvöruþrungnari hætti og nokkurs aðhalds gætt við veitingarnar.
 Veislustjórinn á ballinu var fyrrverandi Eyhreppingur, Þórólfur Árnason (sá eini sanni) og ég óttaðist að þakið myndi nú fjúka af húsinu þegar honum tókst sem best upp, við að lýsa því hvaða augum hann leit sveitungana og lífið og tilveruna svona almennt þegar hann var að alast upp í Söðulsholti. Ég ætla svo að reyna að skrapa saman myndum og koma inn í albúmið við tækifæri og ef fréttakona Skessuhorns kíkir hér á bloggið mætti hún alveg senda mér nokkrar til afnota.
 Það stendur svo til að slútta nefndarstörfunum á næsta föstudagskvöldi og nú er bara að vona að búið verði að aflétta  veitingaaðhaldinu.

 Var ekki einhver að tala um vor í lofti og stillur framundan?

Vorloftið í dag var í kaldara lagi og á töluverðum hraða hér á Nesinu. eða ákaflega súrefnisríkt eins og maður segir. Nú lætur maður sig hlakka til spennufallsins sem verður um miðnætti annað kvöld en þá verður haldin mikil hátíð á vegum sveitarfélagsins hér,matur, skemmtiatriði og ball. Þar sem við hjónin erum í skemmtinefndinni hefur allt verið á útopnu þessa vikuna og nær stressið væntanlega hámarki á morgun.
 En það var farið til Eyja um síðustu helgi sem er alltaf dálítið sérstakt. Það er t.d. umhugsunarefni að til þess að vera örugg  að komast með bílinn með sér á föstudeginum, þurfti að panta fyrir hann í janúar. Síðast þegar við fórum var flogið frá Bakka. Þá var líka sérstakt að skutlast þarna yfir á nokkrum mínútum. Eyjamenn binda greinilega vonir við Bakkahöfn (þar til verður borað,náttúrulega) en þá myndi ferjuferðunum fjölga verulega sem yrði heilmikil breyting.Og þeir taka því alltaf jafnilla þegar ég  kalla þá útlendinga. En kíkið á myndirnar sem komnar eru inn frá ferðinni.

 Það var lokið við rúninginn í dag. Nú liggur næst fyrir bólusetningar og ormalyfsgjöf á fénu. Þar sem allt er spólvitlaust að gera frestast það framyfir helgi. Nýheimta gimbrin er strax búin að læra átið en það hefur greinilega verið erfitt hjá henni í vetur. Engin hornahlaup og holdafarið slakt. Fóðurbreytingin og væntanlegur bati hjá henni er ekki góður svona á síðasta mánuði meðgöngunnar en erfitt að vinna úr því.  Nú er norðanþræsingurinn sem hefur ríkt síðan fyrir helgi að ganga niður og vor í lofti. Ég óttast um kalskemmdir í nokkrum nýræktanna en vona þó  það besta þar til annað sannast. Nú stendur yfir uppfærsla á 123.is  og öll umgengni um heimasíðuna ákaflega erfið og svifasein. Þetta á hinsvegar allt að verða alveg rosalega gott um það er líkur.