Þá eru páskarnir að baki og heldur bæst við massann á bóndanum sem eflaust kemur sér vel á erfiðu vori sem er alveg að bresta á. Og bara ekkert hægt að kvarta undan veðrinu þó aðeins sé farið að kólna aftur  í augnablikinu. Það var svo einstaklega ánægjulegt að taka hér á móti Skrámi í dag en hann yfirgaf þennan sælureit  fyrir cirka 3,5 árum +. Ég sá ekki betur en hann væri líka hæstánægður en það hefur nú kannski verið léttirinn að sleppa úr búrinu eftir fjögurra tíma ferðalag.
  Í augnabliks aðgæsluleysi sleppti ég honum í þvottahúsið og 15 mín. seinna kom á daginn að hann hafði gengið mjög rösklega í það að merkja sér rækilega þennan endurheimta íverustað sinn þar sem hann eyddi fyrstu mán. ævinnar. Sem betur fer hefur dóttirin trúlega einhverntímann sagt sambýlismanninum hvað gerðist ef ég sleppti mér gjörsamlega, því hann fór umyrðalaust að reyna að skúra upp mestu merkingarnar enda málið skylt. Nú þarf síðan að gæta þess vandlega að Asi sleppi ekki inn í þvottahúsið næstu dagana því trúlega myndi hann ganga jafn rösklega í að yfirmerkja merkingarnar og bróðir hans. Ég er svo hundfúll út í eiganda Skráms að hafa ekki lagt vinnu í að temja hann betur, því þetta var snillingsefni. Mér finnst þetta svipað og eiga nýjan  Porche, setja hann bakvið hús og þegar hann er notaður einu sinni í mán. þá er ekki ekið hraðar en á 40.  Til að fyrirbyggja allan misskilning er rétt að taka fram að söluverðið á hvolpinum var ekki Porcheverð heldur svona Lödu Sport verð. Það er dálítið önugt fyrir þá sem eru virkilega að vanda sig við ræktunina á Border Colliernum að ef farið er uppfyrir Lödu prísinn snarminnkar eftirspurnin. Og Jói minn vertu alveg rólegur, ég ætla ekkert að minnast á hana Fiðlu.
  Já svo er stefnt að því að klaufsnyrta kúahjörðina á morgun, ekki verður það skárra heldur en rúningurinn.

 Það var ekki lengur undan því vikist að fara að ná snoðinu af rollunum þrátt fyrir einlægan brotavilja bændanna að draga það sem lengst. Í dag rúðum við yngstu árgangana tvo og hæfilegan fjölda til viðbótar svo hægt væri að klára rest á einum degi. Rúningnum fylgja ýmsar sermoníur því einungis yngsta féð er alrúið. Á hinum er skilið aðeins eftir  til að tryggja þær fram á sumarið. Þó ég haldi því alltaf afdráttarlaust fram að vorið verði gott segir reynslan mér það að yfir 90 % líkur eru á kuldakasti  í maí/júní.Þá er  það er síðan spurning um lengd og rakastig. Þó snoðið sé einskis virði er það dýrmætt þá dagana ef það er á réttum stað. Það liggja síðan miklar spekúlasjónir á bak við það, að skilja það þannig eftir á ánum að  sem mest fari af yfir sumarið. Niðurstaðan er sú að vinnan við að hreinsa féð að haustinu er sáralítil og fljótunnin. Það er alltaf jafn dj. erfitt og leiðinlegt að standa í rúningnum. Nú var það sérstaklega erfitt fyrir féð líka og ákveðið að svelta restina hæfilega fyrir rúninginn sem verður strax eftir páskana.
 Það ætti kannski að ganga yfir bóndann líka.

Ekkert páskahret í dag, ekta veður til útivistar. Atli Sveinn var að þvælast allan daginn uppi Jökli og á fjallgarðinum með Grundfirðingum, nota sleðafærið áður en það hverfur. Hann gætti þess að mæta ekki á svæðið fyrr en eftir mjaltir og passlega í kvöldmat. Hér voru allir í Hrossholti líka í mat svo borðið var þéttsetið. Sett var frétt inn á Söðulsholt með Kolbrúnu Költu í útreiðartúr með pabba sínum. Það styttist örugglega í að hún neiti að vera með öðrum á hestbaki og vilji sjálf. Mamma hennar var ekki gömul þegar afi hennar var farinn að teyma undir henni, mig minnir að það hafi verið Glói sem var barnahesturinn í þá daga.
Svanur bjó sig svo til útivistar, það er fullt tungl og hann ætlar að vera í Rebbabúð í nótt. Mér verður bara kalt við tilhugsunina að vera þar hreyfingarlaus til morguns.  Má ég þá heldur biðja um rúmið mitt og þykka sæng.