Færslur: 2007 Desember
27.12.2007 09:22
Fyrsti bylur vetrarins.
Það er þannig hjá okkur hér á nesinu að jafnfallinn snjór liggur aldrei lengi kyrr nema bloti í hann.Þegar kom fram á gærdaginn fór að komast nokkur hreyfing á súrefnið og snjóinn og var svona pinkubylur á tímabili.
Þetta var samt ekki alvöru og færðin hélst svona nokkurnveginn í lagi.
Það báru svo tvær kýr(kýr/kvíga) í nótt og sú eldri kom með kvígu eins og um var beðið. Það er hinsvegar mörg búmannsraunin og nú stefnir í að mjólkurtankurinn (2200 l.) verði of lítill fyrir helgarmjólkina(3 dagar) þrátt fyrir að það sé með markvissum hætti reynt að dreifa framleiðslunni sem jafnast á árið.
Jólahaldið fer annars fram með ásættanlegum hætti og með miklu aðhaldi í matarræði undirritaðs eru vonandi öll áramótaheit óþörf .
26.12.2007 09:45
Ekta jólaveður.
Þetta er oft notalegasta stund dagsins þegar morgunverkin eru búin og maður er sestur við tölvuna með kaffibollann (þó það sé bannað ) og rennir yfir dagblöðin.
Hér er með eindæmum jólalegt í sveitinni jafnfallinn 10 -15 cm. snjór ,logn og tunglið er svei mér þá á lofti allan sólarhringinn. Og meira að segja rebbarnir sem eru farnir að ganga í æti hjá mér, njóta friðhelgi yfir jólin. Í dag er stefnt að því að yfirfara vélsleðaflotann (tvo hér og tvo þar) og náttúrulega að fara í jólamessuna kl 2.
Dóri og Iðunn ætla á Strandirnar ef veðuspá leyfir svo ég fæ að njóta mín í hesthúsinu sem er að verða fullt af tamninga og þjálfunarhrossum.
Búið er að skifta hrossastóðinu sem gengur úti í þrjá hópa (folöld,tryppi ásamt fylfullum merum og síðan er rest) en hrossin hafa staðið í rúllum í nokkrar vikur.
24.12.2007 12:05
Jesssssss, hvít jól.
Svo bar ein kýrin í morgun tveimur flottum kvígum, nú þarf að leggja höfuðin í bleyti og finna jólaleg nöfn. Einhverjar uppástungur þið þarna úti???
Bóndinn og yngri dóttirnin eru að skella léttum hádegisverði á borðið, síld, rúgbrauð, ristað brauð og reyktur lax.